Në një reagim të publikuar në rrjetin social X, Hoxha bëri të ditur se i ka përcjellë ministrit serb qëndrimin e Shqipërisë lidhur me deklaratat e fundit të një anëtareje të qeverisë së Serbisë për Kosovën, të cilat Tirana i ka cilësuar të papranueshme. Edhe Gjuric ka reaguar për takimin në rrjetin X, por pa përmendur se pala shqiptare kishte ngritur temën e deklaratave të Paunovicit.
Ministri për Evropën dhe Punët e Jashtme, Ferit Hoxha, u takua në Uashington me homologun e tij serb, Marko Gjuriç, në margjinat e Ministerialit për Parandalimin e Rikthimit të Terrorizmit Politik.
Gjatë takimit, dy ministrat shkëmbyen pikëpamje mbi zhvillimet aktuale dhe perspektivat e ardhshme të marrëdhënieve dypalëshe dhe rajonale.
Në një reagim të publikuar në rrjetin social X, Hoxha bëri të ditur se i ka përcjellë ministrit serb qëndrimin e Shqipërisë lidhur me deklaratat e fundit të një anëtareje të qeverisë së Serbisë për Kosovën, të cilat Tirana i ka cilësuar të papranueshme.
“Ripërsërita qëndrimin e qartë dhe të vendosur të Shqipërisë në lidhje me deklaratat e papranueshme dhe të papërgjegjshme të bëra së fundmi nga një anëtare e Qeverisë së Serbisë, si dhe theksova nevojën për të hedhur poshtë pa mëdyshje retorikën që nxit tensione, cenon stabilitetin dhe bashkëpunimin rajonal, si dhe bie ndesh me frymën e fqinjësisë së mirë dhe vlerat evropiane”, shkroi Hoxha.
Sipas ministrit shqiptar, dialogu mbetet mënyra e vetme për të trajtuar mosmarrëveshjet.
“Kjo është ajo që përfaqëson diplomacia: angazhimin në dialog të hapur, përballjen me realitetin dhe adresimin e dallimeve me përgjegjësi”, u shpreh Hoxha.
Edhe Gjuric ka reaguar për takimin në rrjetin X, por pa përmendur se pala shqiptare kishte ngritur temën e deklaratave të Paunovicit.
“Angazhimi i vazhdueshëm në dialogun politik mbetet thelbësor për garantimin e stabilitetit dhe prosperitetit të rajonit, siç e theksova gjatë bisedës sime me ministrin e Jashtëm të Shqipërisë, Ferit Hoxha, në margjinat e Takimit Ministror në Uashington. Gjithashtu, identifikuam mundësi të tjera për të avancuar marrëdhëniet tona dypalëshe dhe për të forcuar bashkëpunimin në fusha me interes të ndërsjellë”, shkroi Gjuric.
