Rama këmbënguli se pushteti i tij nuk është përdorur për të krijuar pasuri personale apo për të dhënë favore të paligjshme. Ai e shprehu këtë edhe në një formulim politik dhe personal: “Jam për të lënë emrin, jo për të mbushur xhepin
Kryeministri Edi Rama e përfundoi adresimin e tij nga Aeroporti “Nënë Tereza”, një komunikim i zhvilluar pa praninë e mediave, ku një pjesë e rëndësishme e fjalës iu kushtua edhe akuzave për korrupsion dhe përgjegjësisë së tij personale gjatë viteve në pushtet.
Rama deklaroi se nuk ekziston asnjë provë që ai të ketë marrë para apo të ketë përdorur funksionet publike për përfitime personale. Ai pranoi se nuk është “engjëll” dhe se nuk është i pagabueshëm, por bëri një ndarje të prerë mes gabimeve politike apo njerëzore dhe korrupsionit të lidhur me përdorimin e pushtetit për pasurim.
“Nuk ka një provë të vetme që një bir nëne ta ketë një qindarkë të tijën në xhepin tim apo në të ardhurat e familjes tonë apo në këmbim të një firme të vetme të hedhur nga unë si kryebashkiak apo si kryeministër”, deklaroi Rama.
Kjo është një deklaratë e fortë, veçanërisht në një klimë politike ku korrupsioni i zyrtarëve të lartë është kthyer në një nga çështjet kryesore të drejtësisë shqiptare. Gjatë viteve të fundit, dhjetëra zyrtarë dhe ish-zyrtarë të lidhur me nivele të ndryshme të administratës dhe politikës janë hetuar, gjykuar ose dënuar për vepra penale të lidhura me korrupsionin dhe shpërdorimin e detyrës.
Edhe figura të rëndësishme politike nga kampet kryesore janë përballur me drejtësinë. Ish-presidenti Ilir Meta ndodhet në një proces penal për akuza të ngritura nga SPAK, ndërsa kryetari i Bashkisë së Tiranës, Erion Veliaj, po gjykohet për akuza që përfshijnë korrupsionin, pastrimin e parave, fshehjen e pasurisë dhe shpërdorimin e detyrës.
Edhe ish-kryeministri Sali Berisha është përballur me një proces gjyqësor për akuzat e lidhura me korrupsionin, ndërsa ai i ka mohuar akuzat.
Në këtë sfond, Rama këmbënguli se pushteti i tij nuk është përdorur për të krijuar pasuri personale apo për të dhënë favore të paligjshme. Ai e shprehu këtë edhe në një formulim politik dhe personal: “Jam për të lënë emrin, jo për të mbushur xhepin, jam për të bërë histori, jo për të bërë pasuri, jam për të transformuar Shqipërinë dhe jo për të deformuar vetveten”.
Kryeministri shtoi se ata që kanë përfituar të drejta zhvillimi apo investime përmes procedurave shtetërore, sipas tij, e dinë se pushteti i tij nuk është përdorur për “favore të errëta apo dhurata të paligjshme”.
Deklarata e Ramës nuk ishte vetëm një mohim politik, por edhe një përpjekje për të vendosur një vijë ndarëse mes përgjegjësisë së tij personale dhe skandaleve që kanë prekur zyrtarë të lartë të shtetit.
Megjithatë, në kushtet kur drejtësia ka vënë nën hetim dhe gjykim një numër figurash të fuqishme politike, pretendimi i kryeministrit se nuk ka marrë asnjë qindarkë përmes funksioneve publike merr një peshë të veçantë politike dhe publike.
