Të rinjtë kërkojnë ndryshime në arsim, kushte më të mira në universitete dhe më shumë mundësi punësimi. Protesta zhvillohet në një klimë të tensionuar politike, ndërsa kujtimi i mobilizimit masiv studentor të vitit 2018 ngre pikëpyetjen nëse pakënaqësia e sotme mund të shndërrohet sërish në një lëvizje të gjerë.
Studentët dhe të rinjtë janë mbledhur pasdite e sotme përpara Ministrisë së Arsimit në Tiranë, në përgjigje të thirrjes për një protestë kombëtare kundër problematikave që, sipas tyre, vazhdojnë të rëndojnë arsimin e lartë dhe perspektivën e të rinjve në Shqipëri.
Në qendër të shqetësimeve janë kushtet në universitete, kostot e studimeve, cilësia e arsimit dhe mungesa e mundësive për të gjetur një punë që përputhet me formimin akademik. Sipas studentit Klevis Tako, një prej nismëtarëve të protestës, një nga problemet kryesore është mospërputhja mes diplomave universitare dhe kërkesave të tregut shqiptar të punës, një situatë që i shtyn shumë të rinj të mendojnë emigrimin si alternativë për të ardhmen.
Organizatorët u kanë bërë thirrje studentëve nga qytete të ndryshme të vendit, si dhe të rinjve shqiptarë që jetojnë jashtë Shqipërisë, t’i bashkohen tubimit. Mesazhi i tyre shkon përtej problemeve të universiteteve, duke shprehur pakënaqësi ndaj asaj që e konsiderojnë mungesë reagimi nga institucionet dhe duke kërkuar ndryshime konkrete.
Para fillimit të tubimit, pranë godinës së Ministrisë së Arsimit u vu re prani e shtuar e forcave të policisë, ndërsa në gatishmëri ishte edhe një autobot ujëhedhës.
Deri tani, nuk ka të dhëna të konfirmuara për numrin e pjesëmarrësve apo për një përshkallëzim të protestës.
Paralelizmi me dhjetorin e vitit 2018 është i pashmangshëm. Atëherë, mijëra studentë dolën në rrugë kundër tarifave të studimit, kostove të provimeve të mbartura dhe kushteve në konvikte. Protesta u përhap në disa qytete dhe u shndërrua në një nga mobilizimet më të mëdha studentore të viteve të fundit në Shqipëri. Studentët paraqitën tetë kërkesa, përfshirë rritjen e financimit për arsimin e lartë dhe përmirësimin e infrastrukturës universitare.
Njësoj si tetë vjet më parë, pakënaqësitë e studentëve lidhen jo vetëm me shpenzimet e arsimit, por edhe me ndjesinë se institucionet nuk po u japin përgjigje problemeve të tyre. Megjithatë, mbetet për t’u parë nëse protesta e sotme do të arrijë të krijojë të njëjtën energji mobilizuese dhe të ruajë pjesëmarrjen edhe në ditët në vijim.
Një ndryshim i rëndësishëm është se tubimi i 13 tetorit zhvillohet në një klimë më të gjerë protestash kundër qeverisë, mes të cilave edhe lëvizja e njohur si “Revolucioni i Flamingove”. Studentët kanë ftuar qytetarët dhe të rinjtë nga të gjitha qytetet që t’u bashkohen, ndërsa nismëtarët kanë artikuluar edhe kërkesa politike, përfshirë dorëheqjen e kryeministrit Edi Rama.
Pyetja kryesore mbetet nëse kjo protestë do të jetë një reagim i izoluar apo fillimi i një mobilizimi më të gjerë. Dhjetori i vitit 2018 tregoi se studentët mund ta detyrojnë qeverinë të reagojë kur dalin masivisht dhe qëndrojnë të bashkuar rreth kërkesave të tyre. Tani, vëmendja është te pjesëmarrja, vijimësia e protestës dhe përgjigjja që do të japin institucionet.
