Një operacion ndërkombëtar kundër trafikut të drogës në Oqeanin Atlantik ka përfunduar me sekuestrimin e 3.7 tonëve kokainë, arrestimin e dy personave dhe vdekjen e një shtetasi spanjoll pas një ndjekjeje me shpejtësi të lartë në det.
Aksioni u zhvillua në ujërat pranë Gadishullit Iberik dhe u finalizua më 12 tetor, pas një hetimi të koordinuar nga autoritetet italiane dhe portugeze. Në qendër të operacionit ishte një gomone e fuqishme, e cila dyshohej se transportonte një ngarkesë të madhe droge drejt tregjeve evropiane.
Ndërhyrja u organizua nga Guardia di Finanza, përmes strukturave të saj në Breshia, në bashkëpunim me Shërbimin Qendror të Hetimit të Krimit të Organizuar (SCICO) dhe njësitë e specializuara detare e ajrore. Hetimet u mbikëqyrën nga Prokuroria e Breshias, në koordinim me Prokurorinë Kombëtare Antimafia të Italisë, ndërsa në operacion morën pjesë edhe autoritetet portugeze, me mbështetjen e Eurojust-it.
Gomonia e dyshuar, e tipit “go-fast”, u lokalizua gjatë lundrimit në Atlantik. Në momentin që njësitë portugeze tentuan ta ndalonin, personat në bord shtuan shpejtësinë për t’i shpëtuar kontrollit, duke shkaktuar një ndjekje në det të hapur.
Situata u përshkallëzua kur gomonia dhe një prej mjeteve të autoriteteve u përplasën gjatë manovrave. Si pasojë, një shtetas spanjoll që ndodhej në bordin e gomones pësoi plagë të rënda. Ai u evakuua me ndihmën e një mjeti ajror shpëtimi, por nuk arriti t’u mbijetonte dëmtimeve.
Dy personat e tjerë që ndodheshin në gomone u arrestuan, ndërsa gjatë kontrollit u zbuluan dhe u sekuestruan 3,700 kilogramë kokainë. Në mjet ndodheshin gjithsej tre persona, dy shtetas spanjollë dhe një person me origjinë nga Gjibraltari.
Vlera e drogës së sekuestruar përllogaritet në rreth 115 milionë euro në tregun me shumicë. Nëse ngarkesa do të arrinte në rrjetet e shpërndarjes me pakicë, të ardhurat e mundshme nga shitja e saj mund të shkonin deri në 750 milionë euro.
Ky nuk është operacioni i parë i zhvilluar në kuadër të hetimeve për këtë rrjet trafikimi. Në korrik, autoritetet kishin ndërhyrë ndaj një tjetër gomoneje në Atlantik, duke sekuestruar 4.7 tonë kokainë dhe arrestuar katër persona.
Me dy operacionet, sasia totale e lëndës narkotike të sekuestruar arrin në 8.4 tonë, duke i dhënë një goditje të rëndësishme rrugëve të trafikut të kokainës drejt Evropës.
Hetimet kanë nxjerrë në pah edhe mënyrën e transportit të përdorur nga trafikantët. Gomonet e shpejta, të njohura si “go-fast”, shërbejnë si mjete për marrjen e ngarkesave të drogës në det të hapur, larg porteve dhe kontrolleve tradicionale.
Sipas skemës së njohur si “drop-off”, anijet e mëdha që vijnë nga Amerika e Jugut lënë ngarkesat në pika të caktuara të oqeanit. Më pas, gomonet e pajisura me motorë të fuqishëm i marrin dhe i transportojnë drejt brigjeve evropiane.
Këto mjete, që zakonisht kanë gjatësi nga 10 deri në 16 metra, mund të zhvillojnë shpejtësi shumë të larta, duke ua vështirësuar autoriteteve identifikimin dhe ndalimin.
Në operacionin e fundit, një rol vendimtar pati mbikëqyrja nga ajri, e cila mundësoi gjurmimin e gomones dhe koordinimin në kohë reale me njësitë detare portugeze, deri në ndërhyrjen përfundimtare.
