Rama premton dyfishim të rritjes së pensioneve nga janari 2027

Facebook
WhatsApp

Paketa fiskale parashikon uljen e TVSH-së në 6 për qind për 54 produkte ushqimore, ndryshime në taksimin e të ardhurave të larta dhe lehtësira për shtresën e mesme. Rama premton gjithashtu ruajtjen e tatimit zero për biznesin e vogël deri në vitin 2029.

Kryeministri Edi Rama prezantoi në Kuvend masat kryesore të buxhetit dhe paketës fiskale për vitin 2027, duke premtuar dyfishimin e rritjes së pensioneve dhe uljen e TVSH-së për 54 produkte ushqimore bazë.

Paketa parashikon gjithashtu ndryshime në taksimin e të ardhurave të larta, lehtësira për shtresën e mesme dhe ruajtjen e tatimit zero për biznesin e vogël deri në vitin 2029. Gjatë fjalës së tij, Rama foli edhe për integrimin evropian, duke veçuar rekomandimin për nisjen e përgatitjeve për traktatin e anëtarësimit të Shqipërisë në BE në vitin 2027.

Kryeministri Edi Rama ka deklaruar se nga janari 2027 do të dyfishohet rritja e pensioneve krahasuar me vitin paraardhës, duke e paraqitur këtë si një zotim që qeveria synon ta mbajë edhe në vitet në vijim. Për këtë qëllim, në projektbuxhetin e vitit të ardhshëm janë parashikuar 20 miliardë lekë, ose rreth 200 milionë euro.

“Nëse ka një kategori të shoqërisë sonë që meriton të ndiejë më shumë nga përfitimet e rritjes ekonomike, padyshim që është kategoria e pensionistëve”, deklaroi Rama nga foltorja e Kuvendit. Ai shtoi se pensionistët e kuptojnë më mirë se kushdo rëndësinë e rritjes ekonomike dhe të shpërndarjes së të ardhurave që krijohen prej saj.

Kreu i qeverisë u zotua se dyfishimi i rritjes do të vijojë edhe në vitet pasardhëse, duke e krahasuar çdo vit me nivelin e rritjes së vitit të parë. Megjithatë, në fjalën e tij nuk u specifikua se sa do të jetë konkretisht shtesa mujore për kategoritë e ndryshme të pensionistëve.

Një tjetër masë e rëndësishme e paketës fiskale është ulja e TVSH-së në 6 për qind për 54 produkte të shportës bazë, mes tyre buka, qumështi, mishi, mielli, vaji, vezët, frutat, perimet dhe ushqimet bazë për foshnjat.

Rama tha se kjo masë synon të lehtësojë barrën e familjeve me të ardhura të ulëta, duke theksuar se ulja e taksës do të shoqërohet me forcimin e kontrollit të çmimeve, në mënyrë që përfitimi të mos përfundojë në xhepat e tregtarëve. Sipas tij, pasqyra e çmimeve do të përdoret për të monitoruar zbatimin e masës dhe për të shmangur abuzimet në treg.

Në paketën fiskale parashikohen edhe ndryshime në taksimin e të ardhurave të larta. Rama njoftoi se për pagat mbi 700.000 lekë do të zbatohet një normë e kombinuar taksimi prej 30 për qind, e përbërë nga 15 për qind tatim mbi fitimin e kompanisë dhe 15 për qind mbi dividendin. Ai paralajmëroi gjithashtu masa për të penguar përdorimin e bizneseve të vogla si mekanizëm për shmangien e detyrimeve fiskale nga subjektet më të mëdha.

Ndërkohë, tatimi për biznesin e vogël do të mbetet zero deri në vitin 2029. Kryeministri foli edhe për lehtësimin e barrës fiskale për rreth 32.000 tatimpagues të shtresës së mesme, si dhe për ndryshime që lidhen me çmimin e karburantit dhe administrimin e taksës së qarkullimit të automjeteve përmes sistemit të DPSHTRR-së.

Në pjesën e fundit të fjalës, Rama u ndal te procesi i integrimit evropian, duke vlerësuar rekomandimin e Komisionit Evropian drejtuar Këshillit Evropian për nisjen, në vitin 2027, të përgatitjeve për traktatin e anëtarësimit të Shqipërisë në BE. Ai e cilësoi këtë një zhvillim të rëndësishëm dhe deklaroi se një rekomandim i tillë nuk do të ishte i mundur nëse vendi nuk do të drejtohej nga Partia Socialiste.

“Nuk ka asnjë mundësi dhe asnjë shans që një rekomandim i tillë historik t’i bëhej Këshillit nga Komisioni Evropian nëse vendi do të ishte ai që përpiqen të paraqesin ata që kërkojnë të diskutohet për protestën”, tha Rama, duke iu drejtuar opozitës.

Buxheti i vitit 2027 dhe paketa fiskale pritet të kalojnë tashmë në shqyrtimin parlamentar, ku masat e propozuara do të diskutohen përpara miratimit përfundimtar.

Never miss any important news. Subscribe to our newsletter.

Lajme të Ngjashme

Never miss any important news. Subscribe to our newsletter.

Lajmet e Fundit

Editor's Pick