Sipas dispozitës, regjistrimi, fiksimi apo ruajtja për publikim e të dhënave që ekspozojnë një aspekt të jetës private të një personi, pa pëlqimin e tij, dënohet me gjobë ose me burgim deri në dy vjet.
Detaje të reja janë bërë publike lidhur me hetimin e Policisë së Tiranës për videot intime të shpërndara në internet, ku shfaqet edhe kompozitori Adrian Hila.
Gazetarja Dorjana Bezat deklaroi se Hila nuk është marrë ende zyrtarisht në pyetje. Sipas saj, agjentët e Krimit Kibernetik kanë komunikuar në mënyrë jozyrtare me kompozitorin dhe e kanë ftuar të japë shpjegime.
Bezat tha se Hila është shprehur i gatshëm të bashkëpunojë me policinë dhe ka deklaruar se e konsideron veten viktimë të publikimit të materialeve.
Sipas gazetares, Hila u ka thënë agjentëve se nuk i ka publikuar vetë videot. Ai ka deklaruar gjithashtu se ishte në dijeni të xhirimit, por nuk dinte se materialet ishin shpërndarë në internet.
Policia e Tiranës pritet ta marrë në pyetje kompozitorin për të sqaruar rrethanat e rastit. Sipas Bezajt, Hila nuk ka deklaruar se do të paraqesë denoncim, por vetëm se është i gatshëm të japë deklarime. Ai pritet të paraqitet në polici më 2 tetor.
Çfarë parashikon Kodi Penal?
Një nga dispozitat kryesore është Neni 121 i Kodit Penal, “Ndërhyrje të padrejta në jetën private”.
Sipas dispozitës, regjistrimi, fiksimi apo ruajtja për publikim e të dhënave që ekspozojnë një aspekt të jetës private të një personi, pa pëlqimin e tij, dënohet me gjobë ose me burgim deri në dy vjet.
Ndërsa shpërndarja, ofrimi për publikim apo publikimi, me çdo mjet ose formë komunikimi publik apo në një mënyrë tjetër, i të dhënave të marra në mënyrën e parashikuar nga kjo dispozitë, dënohet me burgim deri në tre vjet.
Kjo do të thotë se, nëse autoritetet do të konstatonin se materialet janë siguruar dhe më pas janë publikuar ose shpërndarë pa pëlqimin e personit të filmuar, përgjegjësia penale do të vlerësohej në varësi të rolit konkret të secilit person në marrjen, ruajtjen, publikimin apo shpërndarjen e tyre.
Po Neni 122?
Një tjetër dispozitë e përmendur në këtë kontekst është Neni 122, “Përhapja e sekreteve vetjake”.
Ky nen parashikon përgjegjësi për personin që përhap një sekret që i përket jetës private të një personi, kur këtë sekret e ka marrë për shkak të detyrës ose profesionit dhe ka detyrimin të mos e përhapë pa autorizim.
Në rastin bazë, parashikohet gjobë ose burgim deri në një vit, ndërsa kur vepra kryhet me qëllim fitimi ose për të dëmtuar një person tjetër, dënimi mund të shkojë deri në dy vjet.
Megjithatë, zbatimi i Nenit 122 varet nga rrethanat konkrete, veçanërisht nga mënyra se si personi ka siguruar informacionin ose materialin dhe nga ekzistenca e marrëdhënies së detyrës apo profesionit të parashikuar nga kjo dispozitë.
A rrezikon burg personi që shfaqet në video?
Vetëm fakti që një person shfaqet në një material intim të publikuar nuk do të thotë, në vetvete, se ai është përgjegjës penalisht për publikimin e materialit.
Nga faktet e bëra publike deri tani, nuk mund të përcaktohet nëse Adi Hila ka regjistruar, publikuar apo shpërndarë videot, apo nëse materialet janë publikuar nga persona të tjerë pa autorizimin e tij.Prandaj, juridikisht, nuk është e saktë të thuhet paraprakisht se “Adi Hila rrezikon tre vite burg” vetëm mbi bazën e faktit se ai shfaqet në videot që po qarkullojnë.
Nëse materialet janë publikuar pa pëlqimin e tij, dispozita e Nenit 121 mund të jetë relevante pikërisht për personin ose personat që kanë kryer regjistrimin, kanë siguruar materialet në mënyrë të paligjshme dhe/ose i kanë shpërndarë apo publikuar ato, në varësi të provave dhe rolit konkret të secilit.Në këtë fazë, për të përcaktuar përgjegjësinë penale nuk mjafton vetëm ekzistenca e videove. Hetimi duhet të përcaktojë kush i ka regjistruar, kush i ka marrë në posedim, kush i ka publikuar fillimisht dhe kush i ka shpërndarë më tej, si dhe nëse ka pasur pëlqim për regjistrimin ose publikimin.
Për rrjedhojë, çdo përgjegjësi penale do të varet nga provat konkrete dhe nga vlerësimi i prokurorisë dhe gjykatës.
Rasti rikthen në vëmendje edhe kufirin mes interesit publik dhe të drejtës së individit për privatësi: fakti që një person është figurë publike nuk e zhvesh atë automatikisht nga mbrojtja e jetës së tij private.
