Shkak i kësaj proteste është ndalimi i përkohshëm i grumbullimit të qumështit prej katër ditësh, një situatë kjo që ka çuar në mbylljen e përkohshme të qumështores “Vita”.
Një protestë e zhurmshme është zhvilluar sot para Ministrisë së Bujqësisë në Prishtinë nga fermerët e sektorit të qumështit, të cilët kanë shprehur revoltën e tyre ndaj gjendjes kritike në të cilën ndodhet ky sektor.
Me pankarta në duar ku shkruhej, “Mos na lini pa bukë”, “Mos prekni vendet e punës” dhe “Mos e dobësoni industrinë vendore”, fermerët kërkuan ndërhyrje urgjente nga institucionet për zgjidhjen e situatës së krijuar.
Shkak i kësaj proteste është ndalimi i përkohshëm i grumbullimit të qumështit prej katër ditësh, një situatë kjo që ka çuar në mbylljen e përkohshme të qumështores “Vita”.
Fermerët paralajmëruan se ky bllokim kërcënon seriozisht vazhdimësinë e punës së tyre dhe vetë industrinë vendore të qumështit, ndaj kërkuan marrjen e masave të menjëhershme për zhbllokimin e grumbullimit dhe mbështetjen e prodhuesve vendas.
“Jemi mbledhur para Ministrisë së Bujqësisë ne si shoqatë e prodhuesve të qumështit në përkrahje të fermerëve tonë, anëtarësisë sonë, pikave grumbulluese, të gjiihë akterëve, grupeve të interesit sepse ne jemi prodhues të këtij vendi dhe prodhojmë qumështin, për këtë vend, për këtë popullatë.
Tash e një vit trokasim nëpër dyert e shtetit duke njoftuar ministritë përkatëse lidhur me gjendjen e krijuar në këtë sektor dhe duke kërkuar të merren masa që garantojnë investime dhe siguri të produkteve tona që të kemi konkurrencë të barabartë dhe jo importe me çmime të subvencionuara nga Serbia, Bosnja, Maqedonia e Veriut dhe e gjithë regjioni.
Të gjithë ju jeni dëshmitarë të këtyre produkteve dhe na akuzoni neve pse ato produkte shiten nëpër raftet tona me çmime shumë të lira”, ka thënë përfaqësuesi i Shoqatës së Qumështarëve.
Shoqata e Fermerëve Kosovarë të Qumështit e organizoi këtë protestë si një hap të domosdoshëm përballë ndërprerjes së grumbullimit të qumështit të freskët. Kjo situatë po rrezikon seriozisht ekzistencën e shumë prodhuesve vendorë, duke e bërë reagimin e tyre të pashmangshëm.
