Nëna e 17-vjeçares, në një prononcim për mediat, shprehet se vajza e saj po përjeton një gjendje të rënduar psikologjike pas ngjarjes. Ajo kërkon ndërhyrjen e institucioneve përgjegjëse dhe thotë se familja jeton me frikë edhe për sigurinë e fëmijëve të tjerë të mitur.
Një ngjarje e rëndë e ndodhur rreth një muaj më parë në Fier është rikthyer në vëmendjen e opinionit publik, pasi pamjet e dhunës u publikuan në rrjetet sociale.
Sipas informacioneve, një 17-vjeçare është dhunuar fizikisht nga tre bashkëmoshatare brenda një banese. E mitura ishte ftuar nga vajzat me pretendimin se do të sqaronin një mosmarrëveshje, por takimi përfundoi në një akt të rëndë dhune. Gjatë incidentit, njëra prej të pranishmeve ka filmuar ngjarjen, ndërsa dyshohet se ka nxitur edhe agresionin.
Rasti është denoncuar në Policinë e Fierit nga prindërit e 17-vjeçares një ditë pas ngjarjes. Sipas familjarëve dhe banorëve të zonës, nuk pati një reagim të menjëhershëm nga institucionet, ndërsa çështja mori vëmendje të gjerë vetëm pas publikimit të videos në rrjetet sociale.
Të afërmit bëjnë me dije se e mitura, me inicialet P.D., kishte lënë shkollën për të ndjekur një kurs parukerie, me synimin për të krijuar një profesion.
Nëna e 17-vjeçares, në një prononcim për mediat, shprehet se vajza e saj po përjeton një gjendje të rënduar psikologjike pas ngjarjes. Ajo kërkon ndërhyrjen e institucioneve përgjegjëse dhe thotë se familja jeton me frikë edhe për sigurinë e fëmijëve të tjerë të mitur.
Ndërkohë, çështja po hetohet nga Prokuroria pranë Gjykatës së Shkallës së Parë të Juridiksionit të Përgjithshëm në Fier, e cila vijon veprimet për zbardhjen e plotë të rrethanave të ngjarjes.
Pas publikimit të videos tronditëse ku një 17-vjeçare dhunohet barbarisht nga një 19-vjeçare dhe dy të mitura, prokuroria e Fierit deklaron se është duke hetuar edhe për akuzën e heqjes së paligjshme të lirisë.
“Më datë 10.06.2026, Komisariati i Policisë Fier ka referuar materialet procedurale lidhur me një ngjarje të ndodhur më datë 08.06.2026, ku një shtetase e mitur ka kallëzuar se është dërguar në një banesë në qytetin e Fierit dhe më pas është dhunuar fizikisht nga disa shtetase të tjera. Mbi bazën e materialeve të referuara, Prokuroria ka regjistruar procedimin penal për veprën penale “Heqja e paligjshme e lirisë”, e kryer në bashkëpunim”, njoftoi prokuroria.
Pas hetimeve, më datë 1 korrik, gjykata e Fierit ka caktuar masën e sigurisë “arrest me burg” për një 15-vjeçare, e cila kishte dhunuar edhe nënën e saj duke i shkaktuar dëmtime fizike.
Prokuroria u bën thirrje qytetarëve, administratorëve të faqeve në rrjetet sociale dhe subjekteve mediatike të shmangin publikimin, shpërndarjen dhe ripublikimin e pamjeve filmike apo të dhënave që mund të identifikojnë të miturit e përfshirë në këtë ngjarje, duke respektuar detyrimet ligjore për mbrojtjen e privatësisë, dinjitetit dhe të drejtave të tyre.
Ngjarja ndodhi më datë 8 qershor 2026, kur e mitura ka kallëzuar se ishte dhunuar dhe filmuar në banesën e shtetases L. L., 19 vjeçe, nga kjo e fundit dhe dy shtetase të tjera 15-vjeçare.
Pas marrjes në pyetje të vajzave, të cilat pranuan se kishin ushtruar dhunë ndaj shoqes së tyre, shtetases së mitur 17 vjeçe, për motive të dobëta, policia i referoi për veprën penale “Dëmtime të tjera me dashje”.
“Më datë 28.06.2026, nga specialistët për Hetimin e Krimeve, në koordinim me Prokurorinë e Juridiksionit të Përgjithshëm Fier, është arrestuar njëra nga 15-vjeçaret e përfshira në dhunimin e 17-vjeçares. Arrestimi u bë pas kallëzimit të nënës së 15-vjeçares, e cila deklaroi se ishte dhunuar nga vajza e saj, duke i shkaktuar dëmtime fizike. Pas procedurave përkatëse dhe bazuar në vlerësimin e autoriteteve kompetente, 15-vjeçarja e arrestuar është dërguar për trajtim në një institucion shëndetësor të specializuar për shëndetin mendor, në Tiranë”, njoftoi policia.
