Kryeministri i Spanjës, Pedro Sánchez, vizitoi Ceutën dhe e cilësoi valën e emigrantëve si një “shkelje të integritetit territorial” të vendit. Ai akuzoi rrjetet e trafikantëve të qenieve njerëzore për përhapjen e dezinformatave pas një vendimi të fundit të Gjykatës Supreme të Spanjës lidhur me trajtimin e emigrantëve që mbërrijnë nga deti.
Të paktën 57 persona kanë humbur jetën gjatë valës masive të emigrantëve që tentuan të hynin në enklavën spanjolle të Ceutës nga Maroku. Sipas autoriteteve spanjolle, rreth 50 mijë persona kaluan kufirin këtë javë, por shumica e tyre janë kthyer tashmë në Marok.
Shumë nga viktimat u mbytën në det, ndërsa turma të mëdha emigrantësh u përpoqën të hynin në territorin spanjoll si nga toka ashtu edhe nga deti, duke tejkaluar kapacitetet e forcave kufitare.
Kryeministri i Spanjës, Pedro Sánchez, vizitoi Ceutën dhe e cilësoi valën e emigrantëve si një “shkelje të integritetit territorial” të vendit. Ai akuzoi rrjetet e trafikantëve të qenieve njerëzore për përhapjen e dezinformatave pas një vendimi të fundit të Gjykatës Supreme të Spanjës lidhur me trajtimin e emigrantëve që mbërrijnë nga deti.
Sipas Ministrisë së Brendshme spanjolle, autoritetet do të përpiqen të dëbojnë sa më shpejt personat që kanë hyrë në mënyrë të paligjshme. Megjithatë, qindra emigrantë janë larguar vullnetarisht nga Ceuta, duke u kthyer në Marok pasi nuk gjetën ushqim apo strehim.
Kriza ka shkaktuar reagime në mbarë Evropën. Italia ka rivendosur përkohësisht kontrollet kufitare për disa udhëtarë që mbërrijnë nga Spanja, ndërsa Franca ka urdhëruar shtimin e kontrolleve përgjatë kufirit me Spanjën.
Presidentja e Komisionit Evropian, Ursula von der Leyen, deklaroi se Bashkimi Evropian nuk mund të lejojë hyrjen e personave që nuk respektojnë rregullat e unionit. Ndërkohë, ngjarja ka ndezur sërish debatin mbi emigracionin në Evropë, ndërsa opozita spanjolle ka kritikuar ashpër qeverinë e Pedro Sánchez për mënyrën e menaxhimit të situatës.
