Qindra qytetarë marshuan nga sheshi “Skënderbej” drejt Kryeministrisë në ditën e 47-të të protestës, duke kërkuar dorëheqjen e kryeministrit Edi Rama, largimin e klasës politike dhe ndryshime në sistemin e qeverisjes. Gjatë tubimit, aktivistë dhe pjesëmarrës mbajtën fjalime me akuza ndaj institucioneve dhe apeluan për hetime ndaj zyrtarëve të lartë.
Protesta qytetare kundër qeverisë vijoi edhe këtë të enjte, duke shënuar ditën e 47-të të tubimeve të përditshme përpara Kryeministrisë. Qindra qytetarë u mblodhën fillimisht në sheshin “Skënderbej”, për të marshuar më pas drejt selisë së qeverisë, ku përsëritën kërkesën për dorëheqjen e kryeministrit Edi Rama dhe largimin e asaj që e cilësojnë si klasë politike e konsumuar.
Lëvizja, e cila nisi si reagim ndaj projektit të zhvillimit në zonën e mbrojtur të Zvërnecit, është shndërruar në një protestë me kërkesa më të gjera politike dhe institucionale. Protestuesit shprehen se kundërshtojnë korrupsionin, keqqeverisjen, situatën ekonomike dhe mungesën e perspektivës për qytetarët, ndërsa kërkojnë ndryshim të sistemit politik dhe rikthimin e demokracisë përfaqësuese.
Gjatë marshimit në bulevardin “Dëshmorët e Kombit” dhe përpara godinës së Kryeministrisë u dëgjuan thirrje si “Rama ik!”, “Berisha ik!”, “Ikni të gjithë!”, “Poshtë kasta politike!” dhe “Duam Shqipërinë si gjithë Europa!”. Tubimi u shoqërua me flamuj kombëtarë, pankarta me mesazhe ironizuese ndaj politikës dhe këngë patriotike.
Organizatorët deklaruan se protestat do të vazhdojnë çdo ditë deri në realizimin e kërkesave të tyre, duke theksuar se lëvizja nuk synon të përfaqësohet nga figura politike apo individë të veçantë.
Në fjalën e mbajtur para protestuesve, aktivisti Edison Lika u shpreh se lëvizja nuk do të hyjë në negociata me qeverinë dhe se përfaqësuesit e saj janë vetë qytetarët që marrin pjesë në protestë. Ai deklaroi se kërkesa kryesore mbetet dorëheqja e kryeministrit Edi Rama dhe i bëri thirrje Prokurorisë së Posaçme (SPAK) të hetojë kreun e qeverisë për përgjegjësinë që, sipas tij, mban mbi sistemin e korrupsionit në vend.
Me tone të ashpra foli edhe aktivistja Sidorela Vatnikaj, e cila kritikoi klasën politike të tri dekadave të fundit, duke e akuzuar se ka ruajtur pushtetin pavarësisht rotacioneve politike. Ajo kërkoi hetim ndaj kryeministrit Edi Rama dhe zëvendëskryeministres Belinda Balluku, ndërsa deklaroi se mbështetja për SPAK dhe GJKKO shoqërohet me kërkesën për hetime të plota ndaj çdo zyrtari të dyshuar për korrupsion. Deklaratat e saj u pritën me brohoritje nga protestuesit.
Mes pjesëmarrësve ishte edhe një përfaqësuese e lëvizjes studentore, e cila tha se të rinjtë janë lodhur nga emigrimi dhe nga përsëritja e të njëjtave figura politike në drejtimin e vendit. Në një gjest simbolik, studentët hodhën në ajër kapelet e diplomimit, duke përcjellë mesazhin se dëshirojnë të ndërtojnë të ardhmen e tyre në Shqipëri.
Një tjetër protestues deklaroi se lëvizja mbetet paqësore dhe u bëri thirrje qytetarëve në të gjitha qytetet e vendit t’u bashkohen protestave. Sipas tij, ndryshimi mund të arrihet vetëm përmes mobilizimit qytetar dhe jo përmes dhunës.
Protesta u zhvillua pa incidente të raportuara, ndërsa organizatorët ritheksuan se tubimet do të vijojnë edhe në ditët në vijim, duke këmbëngulur se nuk do të tërhiqen deri në përmbushjen e kërkesave të tyre.
