Benjamin Brandon e cilësoi të pajustifikuar masën e sigurisë “arrest me burg” ndaj kryebashkiakut, duke u shprehur se çështja ka pësuar vonesa të pajustifikueshme dhe se paraburgimi nuk është proporcional. Ai kërkoi lirimin e Veliajt, me argumentin se duhet të vijojë ushtrimin e mandatit.
Avokatët e kryebashkiakut të Tiranës, Erion Veliaj, kanë mbajtur sot një konferencë për shtyp. Avokati britanik, Benjamin Brandon e cilësoi të pajustifikuar masën e sigurisë “arrest me burg” ndaj kryebashkiakut, duke u shprehur se çështja ka pësuar vonesa të pajustifikueshme dhe se paraburgimi nuk është proporcional.
Brandon kërkoi lirimin e Veliajt, me argumentin se duhet të vijojë ushtrimin e mandatit. “Kemi një vonesë të përgjithshme prej 16 muajsh dhe të pashpjegueshme. Gjykata e Strasburgut e ka bërë të qartë, Shqipëria duhet ta trajtojë lirimin sa më shpejt të jetë e mundur.
Kjo është një çështje që ka edhe interes publik. Përveç se ndalimi i tij ndikon tek ai vetë, familja e tij, gruaja e tij dhe dy fëmijët e tij, ka edhe një impakt te qytetarët e Tiranës, të cilët e kanë zgjedhur.
Të ndalosh një person duhet të jetë masa e fundit që të zbatohet pas gjykimit. Kemi të bëjmë me ndalimin e një përfaqësuesi të zgjedhur të pushtetit vendor.
Së fundmi mund të them se ne mbështetim plotësisht të gjitha deklaratat dhe parashtrimet e përfaqësuesve të tij ligjorë shqiptarë. Mendojmë se ndalimi i tij si masë sigurimi është i panevojshëm, joproporcional, i paligjshëm dhe ai duhet të lirohet menjëherë, që të vijojë plotësimin e mandatit të tij”, u shpreh Brandon.
Nga ana tjetër avokati, Plarent Ndreca, theksoi se Gjykata e Lartë duhet të dalë sa më shpejt me një vendim.
Kujtojmë se Veliaj ka si synim dërgimin e çështjes së masës së sigurisë në Gjykatën e Strasburgut. sot
