Prania e NATO-s në veri të Kosovës po përshtatet me zhvillimet dhe situatën në terren. Shefi i Shtabit të KFOR-it, gjeneral brigade Chad Daniels, vizitoi trupat në Mitrovicë, duke theksuar se pavarësisht ripozicionimit, misioni do të ruajë praninë e dukshme, kontaktet me komunitetet dhe forcat e gatshme për reagim.
Në një prej zonave më të ndjeshme të Kosovës, KFOR-i po rishikon mënyrën e vendosjes së forcave, pa zbehur praninë dhe kapacitetin për të reaguar. Shefi i Shtabit të misionit të NATO-s, gjeneral brigade Chad Daniels, ka vizituar trupat që shërbejnë në Mitrovicë dhe në veri të vendit, për t’u njohur nga afër me angazhimin e tyre në terren.
Vizita e Daniels u përqendrua te Njësia e Specializuar Shumëkombëshe (MSU) dhe Ekipet për Ndërlidhje dhe Monitorim (LMT), dy struktura që luajnë role të ndryshme, por plotësuese: e para përmes pranisë së dukshme dhe të lëvizshme, ndërsa e dyta përmes kontaktit të vazhdueshëm me komunitetet lokale.
Sipas gjeneralit, pikërisht ky kombinim i pranisë në terren dhe komunikimit me banorët i mundëson KFOR-it të krijojë një tablo sa më të qartë mbi zhvillimet dhe mjedisin e sigurisë.
“Pjesëtarët e MSU-së kontribuojnë në praninë e dukshme dhe të lëvizshme të KFOR-it për siguri dhe gatishmëri, ndërsa Ekipet për Ndërlidhje dhe Monitorim mbajnë kontakte të rregullta me të gjitha komunitetet lokale, duke kontribuar në ndërgjegjësimin e KFOR-it për situatën dhe në kuptimin e mjedisit të sigurisë”, tha Daniels.
Në qendër të vizitës ishte edhe procesi i përshtatjes së pozicionimit të KFOR-it. Misioni po ndryshon gradualisht vendosjen e tij në terren, por synon të ruajë ato kapacitete që i konsideron thelbësore: praninë e dukshme, monitorimin e vazhdueshëm, lidhjet me komunitetet dhe gatishmërinë për të ndërhyrë kur situata e kërkon.
“Ajo që kam parë nga pjesëtarët tanë tregon se si KFOR-i po përshtat pozicionimin e tij, duke ruajtur njëkohësisht kapacitetet që kanë më së shumti rëndësi: një prani të dukshme, ndërgjegjësim të fortë për situatën, angazhim me të gjitha komunitetet lokale dhe forca të gatshme për të reaguar kur është e nevojshme, në përputhje me mandatin tonë të kahershëm të Kombeve të Bashkuara”, u shpreh gjenerali.
KFOR-i ka bërë të qartë se ky ripozicionim nuk do të jetë një proces i menjëhershëm. Ai do të zhvillohet hap pas hapi dhe do të kushtëzohet nga ajo që ndodh në terren, mbi bazën e vlerësimeve të vazhdueshme të situatës së sigurisë.
Në këtë mënyrë, ndërsa konfigurimi i forcave mund të ndryshojë, KFOR-i sinjalizon se në Mitrovicë dhe në veri të Kosovës do të ruajë kapacitetin për të monitoruar zhvillimet dhe për të reaguar në përputhje me mandatin e tij.
