Sipas autoriteteve moldave, avioni që transportonte presidentin ukrainas mundi të nisej vetëm pasi një dron rus u rrëzua në territorin e Moldavisë.
Kryeministri norvegjez Jonas Gahr Støre deklaroi se avioni me të cilin presidenti ukrainas Volodymyr Zelensky po udhëtonte drejt Oslos për funeralin e mbretit të ndjerë Harald V, ishte pranë një incidenti me një dron gjatë nisjes nga Moldavia.
Sipas Støre, ngjarja ndodhi teksa avioni i presidentit ukrainas po ngrihej nga Moldavia për të vijuar udhëtimin drejt Norvegjisë.
“Fluturimi i tij pothuajse u godit nga një dron kur po ngrihej nga Moldavia. Ky është realiteti në të cilin ai jeton”, deklaroi kryeministri norvegjez për transmetuesin publik NRK.
Støre nuk dha hollësi të tjera mbi rrethanat e incidentit, i cili raportohet se ka ndodhur të martën. Ai bëri të ditur gjithashtu se Zelensky, pas qëndrimit në Norvegji, ishte nisur drejt Kanadasë, ku pritej të zhvillonte takime me udhëheqës në Ottawa.
Të mërkurën, një zëdhënës i qeverisë moldave sqaroi se fluturimi i Zelenskyt ishte vonuar pasi hapësira ajrore e Moldavisë u mbyll përkohësisht për shkak të një alarmi për dron.
Sipas autoriteteve moldave, avioni që transportonte presidentin ukrainas mundi të nisej pasi një dron rus u rrëzua në territorin e Moldavisë.
Deri më tani, autoritetet ukrainase dhe presidenti Volodymyr Zelensky nuk kanë bërë komente publike lidhur me incidentin.
