Bashkëkryetari i Komisionit për Reformën Territoriale, Arbjan Mazniku, mbrojti hartën e re duke argumentuar se procesi është zhvilluar përmes 11 dëgjesave dhe 23 mbledhjeve parlamentare, teksa Berisha deklaroi se projekti është kundër interesave të qytetarëve.
Reforma e re Administrativo-Territoriale ka sjellë përplasje të forta në seancën e sotme të Kuvendit, ku mazhoranca dhe opozita janë përballur për hartën e re me 46 bashki.
Partia Socialiste këmbënguli se bashkimi i 15 bashkive do të sjellë më shumë shërbime dhe kapacitete për pushtetin vendor, ndërsa opozita kundërshton projektin dhe kërkon që ndarja e re territoriale të vendoset përmes referendumit.
Në sallë pati replika të drejtpërdrejta mes Sali Berishës dhe Arbjan Maznikut, ndërsa debati u shoqërua edhe me qëndrime të ndryshme brenda vetë grupit socialist.
Bashkëkryetari i Komisionit për Reformën Territoriale, Arbjan Mazniku, mbrojti hartën e re duke argumentuar se procesi është zhvilluar përmes 11 dëgjesave dhe 23 mbledhjeve parlamentare. Sipas tij, të gjitha 61 bashkive u është dhënë mundësia të shprehin qëndrimin e tyre dhe përgjigjet e tyre janë marrë në konsideratë.
Mazniku kundërshtoi akuzat e opozitës se reforma ka motive elektorale. “PS nuk ka interesa elektoralë për këtë çështje”, tha ai, duke shtuar se socialistët kanë fituar 55 nga 61 bashkitë dhe, sipas tij, do t’i fitonin sërish “me apo pa reformë”.
Ai sulmoi gjithashtu propozimin e opozitës për 100 bashki. “Ju kërkoni 100, si lojë kungulleshkash, kërkoni 100 bashki që të merrni më shumë. Më shumë bashki dhe bashki më të dobëta”, deklaroi Mazniku.
Sipas tij, një numër më i madh bashkish do të dobësonte kapacitetet financiare dhe administrative të pushtetit vendor. “Nëse ka një projekt që është centralizues, që ua heq fuqinë qytetarëve dhe bashkive, është ai i 100 bashkive”, tha Mazniku, duke mbrojtur modelin me 46 bashki si alternativën që, sipas tij, forcon pushtetin vendor.
Në fjalën e tij, Mazniku u ndal edhe te Reforma Territoriale e vitit 2014, duke e cilësuar atë si një sukses. “Bashkitë u forcuan, të ardhurat u rritën, borxhet u ulën, fuqia investuese e bashkive u rrit”, deklaroi ai, por shtoi se këto rezultate nuk janë të mjaftueshme për nevojat aktuale të qytetarëve.
“Kur bashkohemi, bëhemi më të fortë”, tha Mazniku, duke kundërshtuar argumentin se shkrirja e 15 bashkive do të largojë shërbimet nga qytetarët.
Ai solli si shembull shërbimet konkrete që, sipas tij, kërkojnë banorët: “Njerëzit nuk jetojnë në hartë, jetojnë në shtëpinë e tyre, ku duan që t’u shkojë rruga, uji. Njerëzit jetojnë në lagjen e tyre, që duan t’u pastrohet dhe t’u ndriçohet. Njerëzit jetojnë në fshatin e tyre, ku duan kanale kulluese e rrugë për arat.”
Pikërisht këtu u përplas me argumentin e opozitës, e cila e ka cilësuar hartën e re si një projekt që “asgjëson” 15 bashki dhe rrezikon të thellojë problemet e zonave periferike.
Sali Berisha kërkoi nga socialistët të mos e votojnë projektligjin dhe propozoi që çështja t’u lihet qytetarëve.
“Hidheni poshtë këtë projekt e të shkojmë në referendum të pyesim qytetarët për një proces madhor që ka të bëjë me jetën dhe shërbimet ndaj tyre”, deklaroi Berisha në Kuvend. Ai propozoi që në referendum të paraqiten dy variante dhe që Kuvendi të miratojë atë që do të votojnë qytetarët.
Berisha e ashpërsoi gjuhën ndaj mazhorancës, duke deklaruar se projekti është kundër interesave të qytetarëve. “Nëse ka mbetur një nanogram në ndërgjegjen tuaj të mykur, pro qytetarëve, hidhni poshtë projektin armiqësor”, tha ai.
Kreu i PD-së akuzoi gjithashtu kryeministrin Edi Rama se po ushtron presion mbi deputetët socialistë për të siguruar votat e nevojshme për miratimin e reformës.
“Ne do të bëjmë çdo përpjekje që reforma të mos kalojë”, deklaroi Berisha para nisjes së seancës. Ai pretendoi se Rama po i detyron deputetët e tij të votojnë pro dhe foli për një proces që, sipas tij, po bëhet për interesa politike.
Berisha e lidhi drejtpërdrejt reformën me pushtetin vendor dhe akuzoi mazhorancën se po vendos për qytetarët pa marrë pëlqimin e tyre.
Në krahun tjetër, Mazniku i hodhi poshtë këto akuza. Ai tha se procesi i konsultimit ka qenë i gjatë dhe se të gjitha bashkitë kanë pasur mundësinë të japin mendimin e tyre. Sipas tij, nuk ka asnjë qëllim për të larguar shërbimet nga qytetarët.
Në një tjetër deklaratë gjatë seancës, Mazniku u tha qytetarëve se “asnjë shërbim nuk largohet” dhe se ata që pretendojnë të kundërtën po i keqinformojnë.
Përplasja mes dy palëve u përqendrua edhe te pyetja nëse numri më i madh apo më i vogël i bashkive garanton shërbime më të mira. Opozita mbron idenë e një numri më të madh njësish, ndërsa PS këmbëngul se bashkitë e vogla nuk kanë kapacitetet e nevojshme financiare dhe administrative për të përballuar përgjegjësitë që u janë dhënë.
Debati u shoqërua edhe me një zhvillim brenda grupit socialist. Erion Braçe ka kundërshtuar hartën e re, ndërsa Vullnet Sinaj, i cili më herët kishte votuar kundër draftit, ndryshoi qëndrim dhe votoi pro në mbledhjen e grupit parlamentar të PS-së. Për miratimin e reformës nevojiten 84 vota.
Mazniku e mbrojti gjithashtu reformën me argumentin e integrimit europian, duke deklaruar se Shqipërisë i duhen bashki më të fuqishme për të përfituar nga fondet e Bashkimit Evropian. “E vetmja rrugë që kemi është që të krijojmë komuna të forta me kapacitete. E vetmja rrugë për të ecur përpara është që të bëjmë bashki më të forta”, tha ai.
Berisha, ndërkohë, vijoi t’u bëjë thirrje deputetëve socialistë që të mos e votojnë projektligjin.
“Të vendosin qytetarët”, përsëriti ai, duke e paraqitur referendumin si alternativën që, sipas opozitës, do të zgjidhte përfundimisht debatin për hartën territoriale.
Reforma parashikon shkrirjen e 15 bashkive dhe reduktimin e numrit të njësive vendore nga 61 në 46. Përballë mazhorancës që kërkon ta miratojë draftin, opozita ka paralajmëruar kundërshtim brenda Kuvendit dhe protestë jashtë tij.
Debati vijon me fokus te votimi i projektligjit dhe qëndrimi përfundimtar i deputetëve socialistë që kanë shprehur rezerva ndaj hartës së re.
