Protestat e studentëve që nisën prej 13 tetorit, janë shoqëruar me episode dhune si nga tubuesit por dhe nga ana e policisë
Gjatë protestave të studentëve, që janë zhvilluar në Tiranë, një nga shqetësimet e ngritura është prania e efektivëve pa numra identifikues. Për këtë, duket se Policia e Shtetit ka marrë masat.
Mësohet se një shkresë zyrtare ka mbërritur në të gjitha komisariatet e Tiranës, e firmosur nga zv.drejtori për Sigurinë Publike në Policinë e Shtetit Edmond Meshini, ku u kërkohet efektivëve zbatimi me korrektësi i detyrimeve të parashikuara sipas ligjit, më specifikisht trajtimi më u kujdesshëm i të miturve.
Nga numrat e identifikimit, tek shoqërimi i të miturve/ Urdhri
Në shkresë kërkohet që të gjithë punonjësit e policisë duhet të jenë të pajisur me numër identifikues, ashtu dhe automjetet që përdoren për operacione.
Urdhri ndalet edhe tek shoqërimi i të miturve. Sipas vendimit, të miturit duhet të shoqërohen në ambiente të veçanta duke u respektuar kapaciteti ligjor. Çdo ambient shoqërimi, investigimi apo zyrë të jetë e pajisur me kamera sigurie si dhe dokumentimi i tyre.
Gjithashtu në shkresë specifikohet që të mos bëhet këqyrja e asnjë pajisje elektronike private pa vendim gjykate si dhe të miturit të jenë të shoqëruar nga prindi/ kujdestari ligjor dhe psikologu gjatë marrjes në pyetje.
Protestat e studentëve që nisën prej 13 tetorit, janë shoqëruar me episode dhune si nga tubuesit por dhe nga ana e policisë. Në rrjetet sociale por dhe në media janë publikuar pamje të rënda të dhunës, por gjithashtu edhe persona civilë që shoqërojnë njerëzit. Po ashtu, është vënë re një kontroll i shtuar në rrugët e qytetit pas shpërndarjes së protestuesve, në tentativë për të ndaluar personat që kanë kryer dhunë.









