Misteri “Nesti Angoni”, Gjykata e Lartë i hap rrugën ankimit të Veliajt

Facebook
WhatsApp

Gjykata e Lartë i ka dhënë fund përplasjes së kompetencave mes GJKKO-së dhe Gjykatës së Tiranës, duke vendosur që kjo e fundit të shqyrtojë ankimin e kryebashkiakut kundër mosfillimit të hetimeve për kallëzimin e tij.

Gjykata e Lartë ka zgjidhur mosmarrëveshjen e kompetencës mes Gjykatës së Posaçme kundër Korrupsionit dhe Krimit të Organizuar dhe Gjykatës së Tiranës për çështjen e kallëzimit të Erion Veliajt, që lidhet me identitetin e personit të njohur si “Nesti Angoni”.

Kolegji Penal ka vendosur se kompetente për shqyrtimin e ankimit të kryebashkiakut është Gjykata e Tiranës, duke i dhënë fund pingpongut gjyqësor për këtë çështje.

Në qendër të përplasjes është një emër që prej kohësh ka ngritur pikëpyetje: “Nesti Angoni”, personi që paraqiti informacionin fillestar në SPAK, mbi bazën e të cilit nisën hetimet ndaj Veliajt.

Kryebashkiaku ka kërkuar identifikimin e personit që fshihet pas këtij emri, duke ngritur pretendime për falsifikim dokumentesh dhe duke kërkuar verifikimin e mënyrës se si kallëzimi është depozituar dhe administruar nga Prokuroria e Posaçme.

Sipas të dhënave të bëra publike më herët, Prokuroria e Tiranës ka verifikuar se një person me emrin “Nesti Angoni” nuk figuron në regjistrin e Gjendjes Civile. Megjithatë, organi i akuzës vendosi të mos fillojë procedim penal, duke argumentuar se nuk ka kompetencë të kontrollojë hetimet e SPAK dhe vërtetësinë e akteve të administruara prej tij.

Veliaj e kundërshtoi këtë vendim në gjykatë, duke kërkuar vijimin e verifikimeve dhe zbardhjen e identitetit të kallëzuesit. Gjykata e Tiranës shpalli moskompetencën në korrik, duke ia kaluar çështjen GJKKO-së. Përplasja përfundoi në Gjykatën e Lartë, e cila tashmë ka përcaktuar se ankimi duhet të shqyrtohet nga gjykata e zakonshme.

Çështja e “Nesti Angonit” është kthyer në një nga debatet që shoqërojnë procesin penal ndaj Veliajt. Mbrojtja e kryebashkiakut ka vënë në dyshim identitetin e kallëzuesit dhe mënyrën e administrimit të informacionit fillestar, ndërsa ekzistenca e një emri që nuk rezulton në regjistrat civilë nuk provon, në vetvete, pavlefshmërinë e hetimeve të SPAK.

Ky zhvillim vjen ndërkohë që procesi kryesor ndaj Veliajt në GJKKO vijon të përballet me shtyrje. Seanca e 27 tetorit u shty për më 3 nëntor për shkak të mungesës së avokatëve, ndërsa kryebashkiaku ka kërkuar që të përfaqësohet vetëm nga Plarent Ndreca, duke kundërshtuar caktimin e mbrojtësve të tjerë.

Tashmë, krahas procesit në Gjykatën e Posaçme, një tjetër betejë gjyqësore pritet të zhvillohet në Gjykatën e Tiranës, ku do të shqyrtohet ankimi që synon të hapë rrugën për verifikimin penal të kallëzimit të bërë në emër të “Nesti Angonit”.

Never miss any important news. Subscribe to our newsletter.

Lajme të Ngjashme

Never miss any important news. Subscribe to our newsletter.

Lajmet e Fundit

Editor's Pick