Sërish përplasje në protestë, arrestohen 5 persona të maskuar

Facebook
WhatsApp

Policia shoqëroi sot 5 persona pas incidenteve pranë Ministrisë së Arsimit, ndërsa për tre prej tyre, të cilësuar si përsëritës të akteve të dhunshme, parashikohet ndëshkimi maksimal financiar. Protesta e studentëve u shoqërua me djegie koshash, hedhje gurësh e molotovësh dhe përplasje për praninë e deputetëve të opozitës.

Policia ka identifikuar dhe shoqëruar pesë persona të dyshuar për përfshirje në aktet e dhunës gjatë protestës së zhvilluar këtë të shtunë në Tiranë, pranë Ministrisë së Arsimit.

Sipas raportimeve, tre prej tyre janë përsëritës të veprimeve të dhunshme dhe ndaj tyre pritet të vendosen gjoba deri në 5 milionë lekë, në zbatim të masave të paralajmëruara nga kryeministri Edi Rama.

Protesta, e cila nisi si një tubim i studentëve dhe më pas u shoqërua edhe nga mbështetës e deputetë të Partisë Demokratike, u zhvillua në Rrugën e Durrësit.

Megjithatë, prania e përfaqësuesve të opozitës shkaktoi përplasje verbale mes studentëve dhe militantëve demokratë. Një pjesë e protestuesve kundërshtuan përfshirjen e PD-së në tubim, duke kërkuar që protesta të ruante karakterin e saj studentor.

Deputeti demokrat Flamur Noka reagoi ashpër ndaj kundërshtimit të pranisë së opozitës, duke deklaruar se PD-ja nuk do të largohej nga protesta.

Ai paralajmëroi gjithashtu se mbështetësit e Arlind Qorit, të cilët i akuzoi për thirrjet kundër Sali Berishës, do të merrnin përgjigjen e tyre.

Ndërkohë, situata u përshkallëzua kur disa të rinj të maskuar u vunë zjarrin koshave të mbeturinave. Më pas, protestues të tjerë përdorën llastiqe dhe hodhën gurë në drejtim të efektivëve dhe godinës së Ministrisë së Arsimit. Raportohet gjithashtu për hedhje molotovësh, duke e zhvendosur protestën nga një tubim kundërshtues në përplasje të drejtpërdrejta.

Policia u bëri thirrje pjesëmarrësve përmes megafonëve që të distancoheshin nga aktet e dhunshme, duke paralajmëruar ndërhyrje nëse situata do të vazhdonte të përshkallëzohej.

Në terren u vendosën forca të shumta policore, ndërsa dy automjete ujëhedhëse qëndruan në gatishmëri për shpërndarjen e turmës. Sipas Balkanweb, protestuesit hodhën gurë drejt Ministrisë së Arsimit dhe policia përsëriti thirrjet për zhvillimin paqësor të tubimit.

Incidentet e kësaj të shtune ndodhin në vazhdën e protestave studentore që prej 13 tetorit kanë përfshirë Tiranën dhe qytete të tjera.

Pakënaqësitë fillestare për gjendjen e arsimit, kostot e studimeve dhe mungesën e perspektivës për të rinjtë janë zgjeruar në një revoltë më të gjerë kundër qeverisjes së Edi Ramës, me kërkesën për dorëheqjen e kryeministrit.

Ndërkohë, paralajmërimi për gjoba të rënda ndaj protestuesve është pjesë e paketës së masave të prezantuara nga Rama më 25 tetor, e cila ka ngjallur debate për kufizimin e së drejtës së protestës dhe përgjegjësinë individuale për aktet e dhunshme.

Never miss any important news. Subscribe to our newsletter.

Lajme të Ngjashme

Never miss any important news. Subscribe to our newsletter.

Lajmet e Fundit

Editor's Pick