BE ngre alarmin për rreziqet në gjyqësorin shqiptar

Facebook
WhatsApp

Problemet që vijojnë të shoqërojnë sistemin e drejtësisë në Shqipëri kanë rikthyer në vëmendje shqetësimet për pavarësinë, sigurinë dhe funksionimin e institucioneve gjyqësore.

Unioni i Gjyqtarëve të Shqipërisë, Shoqata Kombëtare e Gjyqtarëve dhe Shoqata e Prokurorëve kanë reaguar pas publikimit të progres-raportit të Komisionit Europian, duke vlerësuar arritjet e reformës në drejtësi, por edhe duke kërkuar zgjidhje për problematikat e evidentuara.

Në një deklaratë të përbashkët, tre organizatat theksojnë se raporti i publikuar më 4 nëntor 2026 njeh progresin e Shqipërisë në funksionimin e gjyqësorit, veçanërisht pas përfundimit të procesit të vettingut, i cili ka ndikuar në forcimin e pavarësisë, llogaridhënies dhe integritetit të sistemit.

Megjithatë, sipas tyre, dokumenti i Komisionit Europian evidenton një sërë problematikash serioze, që kërkojnë reagim dhe ndërhyrje nga institucionet përgjegjëse.

Një prej shqetësimeve kryesore lidhet me ndërhyrjet e papërshtatshme të zyrtarëve publikë dhe politikanëve në sistemin e drejtësisë, përfshirë edhe nivelet më të larta të pushtetit. Organizatat nënvizojnë se raporti evidenton gjithashtu sulme personale ndaj gjyqtarëve dhe prokurorëve.

Një tjetër çështje e konsideruar problematike është konflikti për zbatimin e vendimit të Gjykatës Kushtetuese mbi pagat e magjistratëve. Sipas deklaratës, kjo përplasje solli bllokimin e buxheteve të gjyqësorit dhe mosshlyerjen e pagave për muajin gusht, një situatë që Komisioni Europian e cilëson të paprecedentë.

Për këtë arsye, gjyqtarët dhe prokurorët kërkojnë që reforma e pagave të respektojë standardet e CEPEJ-it dhe vendimet e Gjykatës Kushtetuese, duke përfshirë në proces edhe konsultime reale me përfaqësuesit e gjyqësorit.

Shqetësime të forta ngrihen edhe për sigurinë fizike të magjistratëve. Raporti i BE-së konstaton mungesë progresi në këtë drejtim, ndërsa bën të ditur se aktualisht tetë magjistratë janë nën masa mbrojtjeje, gjashtë prokurorë dhe dy gjyqtarë.

Në deklaratë përmendet edhe vrasja e gjyqtarit të Apelit të Tiranës, Astrit Kalaja, në tetor 2025. Sipas vlerësimit të raportit europian, kjo ngjarje nuk u pasua nga masa dhe reagime të mjaftueshme institucionale për të garantuar sigurinë e gjyqtarëve dhe prokurorëve në të gjitha nivelet.

Problematikat shtrihen edhe në funksionimin e përditshëm të gjykatave dhe prokurorive, veçanërisht në rrethe, ku mungesa e personelit dhe ngarkesa e lartë me çështje krijojnë vështirësi të konsiderueshme.

Raporti evidenton gjithashtu kapacitete të pamjaftueshme të prokurorive për zhvillimin e hetimeve financiare dhe trajtimin e çështjeve komplekse, duke rekomanduar forcimin e tyre si një përparësi.

Ndërkohë, mungesa e gjyqtarëve, prokurorëve dhe personelit mbështetës, si dhe vonesat në funksionimin e sistemit elektronik të menaxhimit të çështjeve, vijojnë të ndikojnë drejtpërdrejt në cilësinë dhe efikasitetin e drejtësisë.

Në përfundim të deklaratës, tre organizatat u bëjnë thirrje institucioneve përgjegjëse që rekomandimet e Komisionit Europian të mos mbeten vetëm në letër, por të zbatohen pa vonesa.

“Ne, Unioni i Gjyqtarëve të Shqipërisë, Shoqata Kombëtare e Gjyqtarëve të Republikës së Shqipërisë dhe Shoqata e Prokurorëve të Republikës së Shqipërisë, u kërkojmë institucioneve përgjegjëse që rekomandimet e raportit të zbatohen pa vonesë: të ndalen ndërhyrjet dhe sulmet ndaj magjistratëve, reforma e pagave të hartohet në konsultim të vërtetë me gjyqësorin, të merren masa konkrete për sigurinë e gjykatave dhe prokurorive, dhe sistemi i drejtësisë të pajiset me burimet njerëzore e teknike që i nevojiten”, thuhet në deklaratën e përbashkët.

Reagimi vë në pah hendekun mes progresit të njohur nga institucionet europiane dhe problematikave që vijojnë të pengojnë funksionimin e sistemit të drejtësisë në Shqipëri.

Never miss any important news. Subscribe to our newsletter.

Lajme të Ngjashme

Never miss any important news. Subscribe to our newsletter.

Lajmet e Fundit

Editor's Pick