Ndreca: Kam bërë për PS më shumë se gjysma e qeverisë

Facebook
WhatsApp

“Jam përjashtuar nga forumet ku nuk kam qenë pjesë asnjëherë. Unë me PS do të kem të njëjtin raport, e kam mbrojtur sa herë që e kam gjykuar të drejtë”, u shpreh avokati i Erion Veliajt

Plarent Ndreca, ka reaguar pas lajmeve që qarkulluan në media, se ai është përjashtuar nga të gjitha forumet e Partisë Socialiste, referuar Asamblesë Kombëtare. Ndreca tha se ai nuk ka qenë asnjëherë pjesë e forumeve të PS-së, me përjashtim të faktit që është drejtues politik në njësinë 14 në Tiranë.

Ndreca kërkoi dhe një sqarim nga Blendi Klosi, sekretari i përgjithshëm në Partinë Socialiste, në lidhje me statusin dhe arsyet e përjashtimit të tij.

“Unë jam anëtar i Partisë Socialiste, por unë nuk kam qenë përveçse kur isha deputet i PS, anëtar i Asamblesë së PS, ndaj dhe nuk isha pjesëmarrës. Ishte një akt burracakërie, përmendja e emrit tim, kur unë nuk ishja pjesëmarrës, dhe nuk kisha mundësi që të përgjigjesha. Socialistët e dinë shumë mirë sesa kam bërë unë për kauzat e PS. Unë nuk jam anëtar i asnjë forumi në PS.

Drejtoj një zonë politike në Bashkinë e Tiranës, zonën e Astirit, që është njësia 14. Forumet drejtuese janë kryesia, Asambleja, Kongresi. Unë nuk jam anëtar i asnjë i këtyre forumeve, pyetja që mbetet është, cilin nen të statutit kam shkelur. Anëtarësinë nuk ma heq dot njeri. Jemi në 2026, dhe PS duhet të jetë më demokratike, më e hapur. Unë kam vërejtje dhe për zotin Klosi, që duhet të jetë garantuesi i rregullave të statutit të PS, nuk duhet të lejojë as kryetarin e Partisë që ta shkelë.

Kam bërë për PS më shumë se gjysma e qeverisë, e marrë së bashku, nuk jam i penduar për këtë, por ajo që po thoja është, çfarë është ajo që unë kam bërë? Mos të harrojmë një gjë, unë nga 2020 deri sot, vetëm 1 vit e gjysma kam qenë deputet. Jam përjashtuar nga forumet ku nuk kam qenë pjesë asnjëherë. Unë me PS do të kem të njëjtin raport, e kam mbrojtur sa herë që e kam gjykuar të drejtë”, u shpreh Ndreca.

Plarent Ndreca është një prej figurave të Partisë Socialiste që po merr një rol të veçantë në mbrojtjen politike dhe ligjore të Erion Veliajt. Ish-deputeti socialist, i cili ka mbajtur edhe funksione drejtuese në strukturat e PS-së në Tiranë, është pozicionuar hapur në krah të kryebashkiakut të pezulluar, duke mos e fshehur përplasjen mes angazhimit të tij politik dhe detyrës si avokat.

Ndryshe nga Edi Rama, i cili është distancuar politikisht nga Veliaj, Ndreca ka deklaruar se është i gatshëm të sakrifikojë edhe karrierën e tij në PS për të mbrojtur interesat ligjore të klientit.

Ai ka pranuar gjithashtu se ka komunikuar me Ramën për këtë çështje, ndërsa ka përcjellë publikisht edhe dyshimet e Veliajt për përfshirjen e kryeministrit në arrestimin e tij. Ky pozicionim e bën Ndrecën një figurë të rëndësishme në përplasjet dhe rreshtimet që po formësohen brenda Partisë Socialiste.


Never miss any important news. Subscribe to our newsletter.

Lajme të Ngjashme

Never miss any important news. Subscribe to our newsletter.

Lajmet e Fundit

Editor's Pick