Sipas Shehajt, mesazhi që i ka mbërritur deputetit përmbante fjalët: “Mos vazhdo më, se ndryshe do ta tregojmë ne!”. Vetë Erald Kapri ka deklaruar se mesazhi kërcënues, sipas tij, ka ardhur pas një denoncimi që ai kishte bërë lidhur me drejtuesen e Postës Shqiptare në Durrës.
Kryetari i Partisë Mundësia, Agron Shehaj, ka deklaruar se deputeti i kësaj force politike, Erald Kapri, është kërcënuar nga një zyrtar i Partisë Socialiste.
Përmes një videoje të publikuar në rrjetet sociale, Shehaj ka bërë të ditur se në telefonin e deputetit Kapri është dërguar një mesazh me përmbajtje kërcënuese.
Sipas Shehajt, mesazhi që i ka mbërritur deputetit përmbante fjalët: “Mos vazhdo më, se ndryshe do ta tregojmë ne!”
Vetë Erald Kapri ka deklaruar se mesazhi kërcënues, sipas tij, ka ardhur pas një denoncimi që ai kishte bërë lidhur me drejtuesen e Postës Shqiptare në Durrës.
Kapri dhe Shehaj e kanë lidhur rastin me denoncimet e tyre publike ndaj problematikave që pretendojnë se kanë konstatuar në administratë.
Në reagimin e tij, Agron Shehaj ka akuzuar ashpër qeverinë dhe mazhorancën socialiste, duke e paraqitur rastin si një shembull të presionit ndaj opozitës.
“Pasi vodhën me çanta paratë e pensionistëve, zagarët e Edi Ramës kërkojnë t’i mbyllin gojën deputetit të Partisë Mundësia. Kur kërcënojnë një deputet, imagjinoni çfarë u bëjnë këta qytetarëve të zakonshëm, pa imunitet!
Asnjë hap pas. Do denoncojmë çdo padrejtësi dhe do flasim për këdo që nuk ka zë dhe është i pambrojtur përballë pushtetit banditesk e të korruptuar të Edi Ramës”, është shprehur Shehaj.
Deri në këtë fazë, deklaratat për kërcënimin janë bërë publike nga drejtuesit e Partisë Mundësia dhe deputeti Erald Kapri. Mbetet për t’u sqaruar nga institucionet përgjegjëse origjina e mesazhit, identiteti i personit që e ka dërguar dhe nëse pas tij qëndron një zyrtar i Partisë Socialiste, siç pretendohet.
