Gjatë mbledhjes së sotme të grupit parlamentar socialist, kryeministri Edi Rama u ka kërkuar deputetëve të jenë më aktiv në rrjetet sociale dhe në Kuvend, në kushtet kur po vazhdojnë protestat në Tiranë.

Kryeministri Edi Rama mori pjesë në mbledhjen e përjavshme të mbledhjes së Grupit të PS. Burime nga kjo mbledhje, raportojnë se Rama t’i ketë kërkuar deputetëve të jenë më aktiv në rrjetet sociale dhe në Kuvend.

Kjo kërkesë e Ramës vjen në një kohë kur jo i gjithë grupi parlamentar i PS është shfaqur aktiv në rrjetet sociale përballë retorikës së shprehur nga protestuesit. Në këtë mbledhje nuk mori pjesë Elisa Spiropali, e cila në javët e shkuara ka komentuar protestën duke kërkuar që zëri i tyre të dëgjohet dhe të ketë reflektim.

Nga ana tjetër një prononcim për media, kreu i grupit Taulant Balla mes të tjerash foli edhe në lidhje me vendimin e marrë nga Marjana Koçeku, e njohur ndryshe edhe si NeoMalësorja, e cila është larguar nga grupi i PS dhe vijon si deputete e pavarur.

Balla u shpreh se Neomalësorja duhet të dorëzojë mandatin, pasi sipas tij ky mandat është marrë nën logon e PS. “Marjana Kocceku të dorëzojë mandatin, mandati i përket Partisë Socialiste”, tha ai. Deputetja e Partisë Socialiste në Qarkun e Shkodrës, Marjana Koçeku, ka njoftuar më 14 qershor se nuk do të jetë më pjesë e grupit parlamentar socialist, duke deklaruar se do të ushtrojë mandatin si deputete e pavarur.

Përmes një reagimi në rrjetet sociale, Koçeku shkruante se idealet dhe vlerat e saj mbeten të njëjtat që ka pasur përpara se të angazhohej me një forcë politike, duke lënë të kuptohet se ka vendosur të distancohet nga Partia Socialiste. “Prej sot jam deputete e pavarur. Idealet e vlerat e mia janë ato që i kam pasë e i kam shprehë qysh para se me u asociu me një parti. Ato m’i diftojnë kufijtë”- shkroi ajo në postimin e saj.