Protestuesit vijuan tubimin për të 41-ën ditë radhazi para Kryeministrisë, duke kërkuar largimin e kryeministrit Edi Rama. Një prej qytetarëve akuzoi kreun e qeverisë se nuk shqetësohet për vështirësitë e bujqve, fermerëve dhe personave me aftësi të kufizuara, ndërsa bëri thirrje që protesta të mbetet paqësore.
Protesta para Kryeministrisë ka vijuar edhe në ditën e 41-të, ku qytetarë të mbledhur në bulevard kanë përsëritur kërkesën për largimin e kryeministrit Edi Rama. Gjatë tubimit, disa protestues mbajtën fjalime ku shprehën pakënaqësitë e tyre ndaj qeverisë, duke e cilësuar dorëheqjen e kreut të ekzekutivit si një kërkesë të panegociueshme.
Një prej qytetarëve, në fjalën e mbajtur para të pranishmëve, deklaroi se kryeministri nuk tregon ndjeshmëri ndaj problemeve sociale dhe ekonomike me të cilat përballen shumë shtresa të shoqërisë. Sipas tij, personat me aftësi të kufizuara nuk sigurojnë dot kushtet minimale të jetesës, ndërsa fermerët dhe bujqit hasin vështirësi për të mbuluar kostot e punës së tyre.
Ai u shpreh se, ndërkohë që këto probleme mbeten të pazgjidhura, kryeministri është shqetësuar për çështje që, sipas protestuesit, nuk janë prioritet për qytetarët.
“Protesta vijon në ditën e 41 me të njëjtin entuziazëm për të larguar Edi Ramën dhe stafin e tij. Rama nuk turpërohet që njerëzit me aftësi të kufizuara nuk kanë kushtet minimale për të jetuar, nuk turpërohet që bujqit mezi nxjerrin shpenzimet apo që shqiptarët po largohen nga vendi, por turpërohet për një koncert”, u shpreh ai.
Protestuesi shtoi se qytetarët do të vazhdojnë të mblidhen çdo ditë në mënyrë paqësore deri në realizimin e kërkesës së tyre, duke theksuar se dorëheqja e kryeministrit nuk është objekt negociatash.
“Duhet të kërkojmë dorëheqjen e tij pa negociata. Prej 13 vitesh sillet si mbret dhe ka humbur lidhjen me popullin. Ne do të jemi këtu gjithmonë, me protesta paqësore, për të kërkuar largimin e tij”, deklaroi ai.
Në fjalën e tij, qytetari bëri edhe një apel që situata në vend të mos përshkallëzohet në përplasje civile, duke kujtuar ngjarjet e vitit 1997. Sipas tij, protestuesit synojnë ndryshimin përmes mjeteve paqësore dhe jo përmes dhunës.
“Uroj që Shqipëria të mos vijë në ditët e vitit 1997. Jo se populli nuk guxon, por sepse ne kërkojmë që kryeministri të largohet nga detyra në mënyrë demokratike. Nuk pajtohemi me vjedhjet dhe korrupsionin”, tha ai.
Tubimi u shoqërua me pankarta dhe thirrje kundër qeverisë, ndërsa organizatorët kanë bërë të ditur se protestat do të vijojnë edhe në ditët në vazhdim, duke këmbëngulur se mobilizimi do të vazhdojë deri në përmbushjen e kërkesave të tyre.
