Një tjetër element që po shqyrtohet nga autoritetet është aktiviteti i 48-vjeçarit në rrjetet sociale. Në disa fotografi të publikuara prej tij, ai shfaqej duke pozuar me armë. Policia po verifikon nëse ndonjë prej armëve të fotografuara mund të jetë revolveri i përdorur në vrasjen e 45-vjeçares dhe më pas në vetëvrasjen e tij.
Altin Allmuça, shqiptari që vrau partneren e tij, 45-vjeçaren Lulieta Obzova, dhe më pas i dha fund jetës mëngjesin e sotëm në Athinë, rezulton të ketë pasur probleme me ligjin edhe në Shqipëri.
Në vitin 2016, kur ishte 35 vjeç dhe banonte në Tiranë, Allmuça ishte arrestuar pasi dyshohej se përndiqte ish-bashkëshorten e tij, duke i shkaktuar asaj ankth dhe frikë. Në atë kohë, ndaj tij ishte referuar vepra penale e “Përndjekjes”.
Dhjetë vite më vonë, emri i Allmuçës lidhet me një krim të rëndë të ndodhur në Nea Smyrni të Athinës.
Sipas të dhënave të deritanishme, mëngjesin e sotëm ai kishte pritur 45-vjeçaren pranë pallatit ku ajo ndodhej. Pas një konflikti jashtë hyrjes së ndërtesës, Allmuça nxori armën dhe qëlloi disa herë ndaj Lulieta Obzovës, duke e lënë të vdekur në vend.
Menjëherë pas vrasjes, ai përdori të njëjtën armë për t’u qëlluar në kokë. Arma u gjet pranë trupit të tij.
Nga hetimet e deritanishme rezulton se Allmuça dhe Obzova nuk ishin të martuar, por kishin pasur një marrëdhënie sentimentale, e cila dyshohet se ishte shoqëruar nga konflikte. Xhelozia është një nga pistat që po shqyrtohet si motiv i mundshëm i krimit.
Ngjarja është regjistruar nga kamerat e sigurisë së pallatit. Autoritetet greke po përpiqen të rindërtojnë orët e fundit përpara krimit dhe të përcaktojnë natyrën e marrëdhënies mes dy shqiptarëve, në kërkim të motivit që çoi në vrasje.
Sipas “Protothema.gr”, 48-vjeçari ishte i martuar dhe baba i një fëmije. Mësohet se bashkëshortja e tij ka deklaruar për autoritetet se nuk kishte dijeni për marrëdhënien e tij me 45-vjeçaren.
Nëna e Julieta-s mësoi nga vajza tjetër për vrasjen
Nëna e 45-vjeçares është në gjendje shoku, e cila mësoi për vrasjen e së bijës pasi u telefonua nga vajza tjetër.
Teksa ka folur për gazetarët, gruaja tha mes lotësh se Julieta nuk i kishte treguar për ndonjë marrëdhënie që mund të kishte pasur.
“Nuk di asgjë. Ajo nuk më kishte thënë asgjë. Tani mora vesh për vajzën time. Vajza tjetër më telefonoi dhe më tregoi pak kohë më parë. Ajo nuk më kishte treguar për lidhjen e saj. Ajo dhe ish-burri i saj ishin ndarë shumë kohë më parë”, tha nëna e 45-vjeçares.
Kontroll në banesën e 48-vjeçarit
Hetuesit po kontrollojnë edhe banesën e 48-vjeçarit në Tavros, në kërkim të provave që mund të ndihmojnë në sqarimin e marrëdhënies mes tij dhe viktimës, si dhe të tregojnë nëse krimi ishte përgatitur paraprakisht.
Policia po kërkon pajisje elektronike, dokumente dhe materiale të tjera që mund të ndihmojnë në rindërtimin e lëvizjeve dhe komunikimeve të tij përpara ngjarjes.
Në të njëjtën kohë, po analizohen telefonat celularë dhe aktiviteti online i të dy personave. Hetuesit kërkojnë të përcaktojnë nëse përpara vrasjes ka pasur komunikime, takime apo tensione mes tyre.
Natyra, kohëzgjatja dhe intensiteti i marrëdhënies mes 48-vjeçarit dhe 45-vjeçares nuk janë sqaruar ende plotësisht.
48-vjeçari pozonte me armë në rrjetet sociale
Një tjetër element që po shqyrtohet nga autoritetet është aktiviteti i 48-vjeçarit në rrjetet sociale.
Në disa fotografi të publikuara prej tij, ai shfaqej duke pozuar me armë. Policia po verifikon nëse ndonjë prej armëve të fotografuara mund të jetë revolveri i përdorur në vrasjen e 45-vjeçares dhe më pas në vetëvrasjen e tij.
Deri më tani nuk është përcaktuar nëse arma e krimit shfaqet në ndonjë prej këtyre fotografive.
Ngjarja ndodhi në orët e para të mëngjesit të së dielës. Banorët e zonës kanë treguar se rreth orës 05:30 dëgjuan disa të shtëna.
“Fqinjia tha se dëgjoi të shtëna me armë zjarri herët në mëngjes. Kjo është shtëpia e prindërve të mi, dëgjova tre të shtëna me armë zjarri në orën 5:30 të mëngjesit”, tha një grua që ndodhej në zonë.
Një tjetër banore tregoi se kishte dëgjuar tri zhurma të forta me disa sekonda diferencë.
“Isha duke fjetur, por nuk isha në gjumë të thellë në shtëpi. Papritmas dëgjuam tre zhurma shumë të forta, të cilat nuk e dinim nëse ishin të shtëna me armë zjarri apo jo, por ishin shumë të forta. Numërova tre. Jo të përsëritura, pati një periudhë prej tre, katër, pesë sekondash, njëra pas tjetrës”, tha ajo.
“Nuk e besoja, nuk më shkoi ndërmend se ishte një e shtënë me armë zjarri, por ishte…”, përfundoi dëshmitarja.
Hetimi është marrë përsipër nga departamenti kompetent i Drejtorisë së Krimit të Organizuar. Hetuesit po përpiqen të krijojnë një panoramë të plotë të marrëdhënies mes dy personave dhe të zbulojnë se çfarë ndodhi në ditët dhe orët përpara krimit, me qëllim përcaktimin e motivit të vrasjes.
