Libri që zbulon sekretet e presidentit francez Macron!

Facebook
WhatsApp

I shkruar nga gazetarja politike Catherine Nay, sjell një portret ndryshe të kreut të Elizesë, duke e përshkruar si një njeri jashtëzakonisht inteligjent, por emocionalisht të izoluar, me vështirësi për të pranuar kritikat dhe për të vënë në pikëpyetje vendimet e veta.

Një biografi e re për presidentin francez Emmanuel Macron hedh dritë mbi anën më pak të njohur të jetës së tij, duke zbuluar detaje nga fëmijëria, marrëdhënia e pazakontë me gjyshen dhe historia e dashurisë me bashkëshorten Brigitte, e cila është 24 vite më e madhe se ai.

Libri, i shkruar nga gazetarja politike Catherine Nay, sjell një portret ndryshe të kreut të Elizesë, duke e përshkruar si një njeri jashtëzakonisht inteligjent, por emocionalisht të izoluar, me vështirësi për të pranuar kritikat dhe për të vënë në pikëpyetje vendimet e veta.

Në intervistat e dhëna për biografinë, Macron pranon se nuk e ka përjetuar kurrë adoleshencën si bashkëmoshatarët e tij dhe se, edhe sot, ndihet ende si një fëmijë.

“Unë jam ende fëmijë. Nuk kam qenë kurrë adoleshent. Nuk më pëlqejnë adoleshentët. Nuk i kuptoj ata. Gruaja ime i kupton ata”, është shprehur presidenti 48-vjeçar, sipas gazetës “The Times”.

Gjyshja që kontrollonte jetën e tij, Macron i premtoi se nuk do të takohej më me vajza

Sipas autores, fëmijëria e presidentit francez është dominuar nga dy figura të fuqishme femërore, gjyshja e tij, Manette, dhe më vonë bashkëshortja Brigitte.

Manette, një ish-drejtoreshë shkolle, përshkruhet si një grua autoritare, e cila kishte ambicien ta formësonte nipin sipas modelit të saj të përsosur, duke e kthyer në një lloj “kryevepre” personale.

Ajo e mbante Macronin të përqendruar pothuajse tërësisht te studimet dhe kishte një kontroll të fortë mbi jetën e tij. Marrëdhënia u tensionua kur, në moshën 14-vjeçare, ai nisi të shfaqte interes për vajzat.

Sipas biografisë, Macron arriti të rifitonte besimin e gjyshes vetëm pasi i premtoi se “Nuk do të shoh më kurrë vajza”.

Autorja thekson se lidhja e tij me Manette ishte shumë më e fortë sesa ajo me prindërit, ndërsa ndikimi i saj duket se ka vazhduar të shoqërojë presidentin edhe në jetën e rritur.

Këtë ndikim e pranon edhe vetë Brigitte Macron, e cila beson se bashkëshorti i saj nuk është shkëputur emocionalisht nga figura e gjyshes.

“Emmanuel ende nuk e ka varrosur gjyshen e tij. Ai as nuk e ka zëvendësuar atë. Ai duhet t’i nënshtrohet psikoanalizës”, i ka thënë Brigitte autores së librit.

Historia e pazakontë me Brigitte, lidhja nisi kur Macron ishte 15 vjeç

Një pjesë e rëndësishme e biografisë i kushtohet edhe historisë së marrëdhënies mes Emmanuel dhe Brigitte Macron, e cila nisi në rrethana të pazakonta.

Kur Emmanuel ishte vetëm 15 vjeç, Brigitte ishte 39 vjeçe, e martuar dhe nënë e tre fëmijëve. Ajo ishte mësuesja e tij e teatrit, ndërsa Macron ishte shok klase me njërin prej fëmijëve të saj.

Sipas Catherine Nay, ishte vetë Macron ai që mori iniciativën për t’u afruar me mësuesen. Ndjenjat e tij për Brigitte përshkruhen në libër si “joshja e një të rrituri”.

Ai madje i propozoi të shkruanin së bashku një dramë, në mënyrë që të krijonin më shumë mundësi për të kaluar kohë pranë njëri-tjetrit.Biografia zbulon edhe një bisedë të veçantë mes tyre. Brigitte i kishte treguar një shoqeje se në një moment e kishte pyetur Macronin nëse dëshironte të kishte fëmijë të tijët.

“Jo, dua që ti të kujdesesh vetëm për mua”, thuhet se i ishte përgjigjur ai.

Izolimi dhe bindja se ka gjithmonë të drejtë, dobësia që e shoqëron edhe në politikë

Përtej marrëdhënieve familjare, libri ndalet edhe te tiparet e karakterit që, sipas autores, kanë ndikuar në mënyrën se si Macron ushtron pushtetin.

Ai përshkruhet si një fëmijë me inteligjencë të jashtëzakonshme, por i izoluar nga bashkëmoshatarët, me pak miq dhe pa shumë mundësi për të krijuar marrëdhënie të zakonshme shoqërore.

Sipas Nay, kjo prirje për izolim nuk është zhdukur as në moshën e rritur. Presidenti francez paraqitet si një figurë gjithnjë e më e shkëputur nga njerëzit përreth, duke kaluar pjesën më të madhe të jetës së përditshme brenda Pallatit Elize.

Autorja argumenton se vetëbesimi i jashtëzakonshëm, që e ndihmoi Macronin të mbërrinte në presidencë në moshën 39-vjeçare, duke u bërë presidenti më i ri i Francës që nga koha e Napoleonit, është kthyer në një pengesë për aftësinë e tij për të pranuar gabimet.

“Introspeksioni nuk ekziston në botën e tij shpirtërore. Edhe kur kërkon falje, ai kthehet më vonë për të shpjeguar se kishte të drejtë”, deklaroi Nay në një intervistë për radion franceze France Inter.

Gazetarja e lidh këtë tipar edhe me vendimin e Macronit për të shpallur zgjedhje të parakohshme parlamentare në vitin 2024. Një vendim që, sipas saj, rezultoi politikisht i kushtueshëm, pasi e la qeverinë pa shumicë parlamentare dhe e futi Francën në një periudhë të zgjatur paqëndrueshmërie.

Në këtë mënyrë, biografia e re përpiqet të shpjegojë se si fëmijëria, ndikimi i fortë i gjyshes dhe marrëdhëniet e pazakonta personale mund të kenë ndikuar në formimin e karakterit të një prej liderëve më të rëndësishëm të Europës.

Never miss any important news. Subscribe to our newsletter.

Lajme të Ngjashme

Never miss any important news. Subscribe to our newsletter.

Lajmet e Fundit

Editor's Pick