Japonia barazoi 2-2 ndaj Holandës në ndeshjen e parë të Grupit F, ndërsa vëmendjen e tifozëve dhe mediave e mori një mënyrë e veçantë komunikimi e trajnerit Hajime Moriyasu gjatë minutave vendimtare të takimit.
Në sfidën spektakolare të zhvilluar në Dallas, Japonia arriti të rikuperojë dy herë disavantazhin për të marrë një pikë të rëndësishme ndaj Holandës. Megjithatë, përveç rezultatit dhe emocioneve në fushë, një detaj i veçantë nga stafi teknik japonez u bë shpejt temë diskutimi.
Trajneri i Japonisë, Hajime Moriyasu, u pa gjatë ndeshjes duke përdorur një tabelë të bardhë për t’u transmetuar lojtarëve informacione të rëndësishme nga stoli. Në vend të gjesteve të zakonshme apo thirrjeve të vazhdueshme, tekniku japonez dhe ndihmësit e tij ngritën tabela me numra të mëdhenj, duke treguar kohën e mbetur deri në fund të takimit.
Pamjet televizive treguan stafin japonez duke shfaqur fillimisht numrin tre, më pas dy dhe në fund një, në një përpjekje për t’i mbajtur lojtarët të përqendruar në minutat e fundit të sfidës. E njëjta metodë ishte përdorur edhe në fund të pjesës së parë, duke dëshmuar se bëhej fjalë për një strategji të menduar paraprakisht dhe jo për një veprim spontan.
Kjo mënyrë komunikimi u vlerësua nga shumë tifozë në rrjetet sociale, të cilët e konsideruan si një zgjidhje të thjeshtë, por efektive për të shmangur keqkuptimet në një stadium me atmosferë të zhurmshme. Sipas tyre, mesazhi vizual i ndihmon lojtarët të menaxhojnë më mirë ritmin e lojës dhe të kuptojnë rëndësinë e çdo minute në fazat vendimtare.
Metoda e Moriyasut ka ngjallur kureshtje dhe diskutime në prag të ndeshjes së ardhshme të Japonisë në Kupën e Botës, ndërsa shumëkush pyet nëse kjo qasje e pazakontë mund të shndërrohet në një prirje edhe për skuadrat e tjera në të ardhmen.
