Egnatia kreu një përmbysje spektakolare ndaj Shamrock Rovers dhe siguroi për herë të parë një vend në fazën e ligës së një kompeticioni evropian. Dinamo City gjithashtu dhuroi një tjetër mbrëmje të madhe, duke përmbysur Audën dhe duke kaluar në play-off-in e Conference League. Të dyja skuadrat shqiptare vijojnë kështu aventurën evropiane, duke synuar të shkruajnë faqe të reja në historinë e klubeve.
Egnatia ka shkruar një tjetër faqe të rëndësishme në historinë e saj evropiane. Kampionët e Shqipërisë përmbysën në mënyrë spektakolare Shamrock Rovers, duke fituar 5-1 në Rrogozhinë dhe duke siguruar kualifikimin me rezultatin e përgjithshëm 6-4.
Pas humbjes 3-1 në ndeshjen e parë, skuadra e Nevil Dedes hyri në fushë me një tjetër fytyrë dhe e zgjidhi shumë shpejt sfidën. Adjesa kaloi Egnatian në avantazh që në minutën e 4-t, ndërsa Albanese dyfishoi shifrat në të 11-ën.
Gruda shënoi golin e tretë në minutën e 20-të, ndërsa Adjesa realizoi sërish në të 38-ën. Edhe pse Egnatia mbeti me 10 lojtarë pas përjashtimit të Ndrecës në fundin e pjesës së parë, rrogozhinasit nuk u tërhoqën.
Albanese shënoi golin e pestë në minutën e 58-të, duke i dhënë ekipit shqiptar një avantazh të madh. Shamrock Rovers arriti të shënonte me Burke në minutën e 74-t, por goli nuk ndryshoi fatin e përballjes.
Kualifikimi është historik për Egnatian, pasi klubi siguron për herë të parë pjesëmarrjen në fazën e ligës të një kompeticioni evropian. Kalimi në play-off-in e Europa League i garanton gjithashtu matematikisht një vend në fazën e ligës së Conference League, pasi skuadrat që eliminohen në këtë fazë të Europa League vijojnë garën në Conference League.
Por Egnatia nuk ka ndërmend të ndalet këtu. Kampionët shqiptarë do të luajnë në play-off-in e Europa League kundër norvegjezëve të Lillestrom, me synimin për të siguruar një tjetër arritje historike dhe për të kaluar në fazën e ligës së këtij kompeticioni.
Dinamo përmbys Audën dhe kalon në play-off
Edhe Dinamo City dhuroi një mbrëmje të madhe evropiane. Skuadra e Ilir Dajës përmbysi humbjen 1-0 të ndeshjes së parë ndaj letonezëve të Audës, duke triumfuar 4-0 në “Elbasan Arena” dhe duke siguruar kualifikimin me rezultatin e përgjithshëm 4-1.
Dinamo e nisi takimin me ritëm të lartë dhe gjeti golin e parë në minutën e 36-të. Qardaku lëshoi një goditje të fortë nga hyrja e zonës, duke e dërguar topin në cepin e portës.
Në fundin e pjesës së parë erdhi edhe goli i dytë. Në minutën e 45-të, Qefalia realizoi pas një kombinimi me Qardakun, duke i dhënë Dinamos një avantazh të rëndësishëm përpara pushimit.
Skuadra kryeqytetase vazhdoi të kontrollojë lojën edhe pas kthimit në fushë. Në minutën e 51-të, një kundërsulm i shpejtë u finalizua nga Ayodeji, i cili shënoi golin e tretë dhe e afroi Dinamon me kualifikimin.
Fadairo vulosi gjithçka në minutën e 79-të, duke shënuar golin e katërt dhe duke shpërthyer festën në kampin dinamovit.
Me këtë sukses, Dinamo City kalon për herë të dytë në historinë e saj në play-off-in e Conference League. Në raundin e ardhshëm, skuadra e Ilir Dajës do të përballet me Pafos, në një tjetër sfidë që mund t’i afrojë edhe më shumë me fazën e ligës.
Egnatia dhe Dinamo janë tashmë dy përfaqësueset shqiptare që vijojnë rrugëtimin evropian. Njëra tashmë e ka siguruar matematikisht një vend në fazën e ligës së Conference League, ndërsa tjetra kërkon të bëjë hapin e radhës në Conference League. Mbrëmja e 13 gushtit konfirmoi kështu një tjetër natë të suksesshme për futbollin shqiptar në arenën ndërkombëtare.
