Kryetari i Grupit Parlamentar të PS-së, Taulant Balla, deklaroi se projektligji për pagat e magjistratëve, i hartuar pas vendimit të Gjykatës Kushtetuese, do të shqyrtohet me prioritet dhe do të votohet në seancën plenare të 17 shtatorit. Ai theksoi se përcaktimi i pagave është kompetencë e Kuvendit dhe jo e pushtetit gjyqësor.
Kryetari i Grupit Parlamentar të Partisë Socialiste, Taulant Balla, ka bërë të ditur se projektligji që adreson çështjen e pagave të magjistratëve do të votohet në Kuvend më 17 shtator.
Duke folur në Konferencën e Kryetarëve, Balla deklaroi se mazhoranca ka respektuar vendimin e Gjykatës Kushtetuese dhe ka depozituar brenda afateve projektligjin përkatës. Sipas tij, nisma duhet të kalojë fillimisht për shqyrtim në komisionet parlamentare dhe më pas të dërgohet për miratim në seancë plenare.
“Në Kuvend ka 140 deputetë, por vetëm dy deputetë të Partisë Socialiste kanë dorëzuar një projektligj që adreson vendimin e Gjykatës Kushtetuese. Kështu po ushtrojmë përgjegjësinë që na takon”, u shpreh Balla.
Ai theksoi se projektligji është depozituar brenda afatit të përcaktuar nga Gjykata Kushtetuese dhe do të trajtohet me prioritet, por jo përmes procedurës së përshpejtuar. Sipas Ballës, data 17 shtator është parashikuar për shqyrtimin dhe miratimin e tij në Kuvend.
Kreu i grupit parlamentar socialist iu përgjigj edhe kritikave të opozitës, duke deklaruar se Partia Socialiste nuk ka vënë asnjëherë në diskutim vendimet e Gjykatës Kushtetuese apo të institucioneve të tjera të drejtësisë.
“Ne i respektojmë vendimet e Gjykatës Kushtetuese. Nuk protestojmë kundër gjykatave, por ushtrojmë përgjegjësitë që na ngarkon Kushtetuta”, deklaroi ai.
Balla nënvizoi gjithashtu se, në një sistem demokratik të bazuar në ndarjen e pushteteve, kompetenca për përcaktimin e pagave i takon Kuvendit. Sipas tij, gjykatat mund të shprehen për kushtetutshmërinë e ligjeve, por vendimmarrja për nivelin e pagave mbetet përgjegjësi e pushtetit legjislativ.
“Në një shtet demokratik, kompetenca për caktimin e pagave është e Kuvendit. Prisni të flasë Kuvendi”, përfundoi Balla.
