Veteranë të luftës dhe drejtues të partive politike, u shprehën se vendimi i Hagës do të ketë peshë të madhe për familjet e dëshmorëve, veteranët dhe familjet e prekura nga lufta. Ra në sy mungesa e drejtuesve të Vetëendosjes dhe LDK, Albin Kurti dhe Lumir Abdixhiku.
Dhjetëra mijëra qytetarë, marshuan të shtunën në Prishtinë në mbështetje të ish-krerëve të Ushtrisë Çlirimtare të Kosovës që po gjykohen në Hagë.
“Marshi për Liri” u mbajt pak ditë para vendimit të paralajmëruar për 16 shtator nga Dhomat e Specializuara të Kosovës. Tubimi përfundoi rreth orës 15:00, me këngën “Mora fjalë”, interpretuar nga Shkurte Fejza dhe kënduar edhe nga turma.
Kryetari i PDK-së, Bedri Hamza, tha se pjesëmarrja masive dëshmon se Kosova vazhdon ta kujtojë dhe mbrojë sakrificën e UÇK-së. “Sot nuk kemi ardhur këtu për të marshuar, kemi ardhur për të dëshmuar se Kosova kujton, nderon dhe mbron UÇK-në”, tha Hamza.
Ai tha se vendimi i Hagës do të ketë peshë të madhe për familjet e dëshmorëve, veteranët dhe familjet e prekura nga lufta. “Atëyre që e marrin vendimin u themi, mendoni për pasojat para se të vendosni me 16 shtator”, deklaroi Hamza.
Kreu i Aleancës, Ardian Gjini, e cilësoi marshin mesazh për miqtë dhe kundërshtarët e Kosovës, duke folur para mijëra pjesëmarrësve. “Sot armiqve po u flet populli i lirë i Kosovës. Gjithë ju që jeni këtu – LIRI!”, tha Gjini.
Ai rikujtoi se UÇK-ja kishte luftuar kundër forcave serbe, të cilët kryen për vrasje, dhunime dhe krime ndaj civilëve shqiptarë. “Kanë luftuar kundër atyre që i kanë mbushur kamionët frigoriferë me trupat e bashkëqytetarëve tanë”, deklaroi Gjini.
Në marsh ishte edhe deputeti i Vetëvendosjes, Adnan Rrustemi, ndërsa deputeti Albin Kurti nuk mori pjesë. “Themelimi i Gjykatës Speciale ka qenë i gabueshem, i padrejtë. E rëndësishme që vendimi të jetë lirues”, tha Rrustemi.
Në tubim mungoi edhe kryetari i LDK-së, Lumir Abdixhiku, gjë që u kritikua nga kryetari i Nismës Socialdemokrate, Fatmir Limaj. “Për mua është e pakuptimtë, shkronjat e UÇK-së duhet t’i bashkojnë ata që e ndjejnë vetën shqiptarë dhe krenarë”, tha Limaj.
Ai tha se vendimi i së mërkurës nuk është çështje individuale, por lidhet me të kaluarën dhe të ardhmen e Kosovës. “Beteja nuk duhet me u ndal në çfarëdo varianti, shpresojmë që të përfundojë me të mërkurën”, deklaroi Limaj.
Mbështetje për marshin shprehu edhe ish-kryeministri Isa Mustafa, përmes një reagimi në Facebook para nisjes së tubimit. “Kosova sot krenohet dhe solidarizohet me personalitetet kyçe të UÇK-së që po gjykohen në Hagë; kërkon drejtësi dhe paanshmëri për ta”, shkroi Mustafa.
Ai shtoi se Kosova pret kthimin e tyre në vend, duke theksuar se ata “luftuan për liri dhe pavarësi”.
