Moti i keq ka shkaktuar probleme në disa qarqe të vendit, duke sjellë përmbytje në Durrës, trafik të rënduar në Tiranë, rrëshqitje gurësh në akset rrugore dhe ndërprerje të energjisë elektrike në Fier, Patos e Mallakastër. Probleme raportohen edhe në Kukës, Burrel dhe zonat përreth, ndërsa reshjet e dendura pritet të vijojnë edhe gjatë fundjavës.
Reshjet e dendura të shiut, të shoqëruara në disa zona me shkarkesa elektrike, kanë sjellë problematika në disa qarqe të vendit këtë të premte, më 9 tetor. Përmbytjet në rrugë, rrëshqitjet e gurëve dhe ndërprerjet e energjisë elektrike kanë vështirësuar jetën e përditshme të qytetarëve dhe qarkullimin e automjeteve, ndërsa ekipet e mirëmbajtjes dhe shërbimet përkatëse po përballen me pasojat e motit të paqëndrueshëm.
Në Tiranë, trafiku është rënduar që në orët e para të mëngjesit, duke krijuar radhë kilometrike në disa prej akseve kryesore të kryeqytetit. Problematikat më të mëdha raportohen përgjatë Unazës së Madhe, në Laprakë, Don Bosko, zonën e Ali Demit, Astir dhe Sauk. Reshjet e vazhdueshme, të kombinuara me fluksin e lartë të automjeteve në orarin e mëngjesit, kanë ngadalësuar ndjeshëm qarkullimin.
Ndërkohë, në Durrës, grumbullimi i ujit ka përmbytur disa rrugë, duke vështirësuar lëvizjen e automjeteve dhe këmbësorëve. Situata paraqitet më problematike në lagjen nr. 1, në aksin që lidh shëtitoren Taulantia me zonën e Currilave, ku uji ka pushtuar rrugën dhe trotuaret. Probleme janë evidentuar edhe në kryqëzime pranë stadiumit “Niko Dovana”, në lagjen nr. 18.
Pasojat e reshjeve janë ndier edhe në veri dhe verilindje të vendit. Në aksin nacional Burrel–Skuraj, veçanërisht në zonën e Shkopetit, janë regjistruar rrëshqitje gurësh dhe inertesh nga shpatet e malit, duke krijuar rrezik për drejtuesit e mjeteve. Gjendja e rrugës rëndohet nga gropat në asfalt, mungesa e barrierave mbrojtëse anësore dhe sinjalistika e pamjaftueshme.
Në qarkun e Kukësit, reshjet kanë shkaktuar rënie gurësh dhe materialesh inerte në disa akse, përfshirë rrugët drejt Valbonës, Fierzë–Bajram Curri, Qafë Morinë, Kam–Krumë, Kukës–Qafë Mali, si dhe segmentet drejt Shishtavecit dhe Bushtricës. Mjegulla ka vështirësuar gjithashtu qarkullimin në qytetin e Kukësit. Ekipet e mirëmbajtjes kanë nisur punën për pastrimin e rrugëve dhe normalizimin e lëvizjes.
Një tjetër problematikë është regjistruar në jug të vendit, ku më shumë se 30 fshatra në Fier, Patos dhe Mallakastër kanë mbetur pa energji elektrike si pasojë e defekteve në rrjetin e furnizimit. Sipas burimeve nga filiali i OSHEE-së në Fier, ndërprerjet kanë nisur që mbrëmjen e së enjtes, fillimisht në fshatrat e Levanit, dhe janë zgjeruar me përkeqësimin e motit gjatë mëngjesit të së premtes.
Shkarkesat elektrike që shoqërojnë reshjet kanë nxjerrë jashtë funksionit tetë fidera në bashkitë Fier, Patos dhe Mallakastër. Zonat e prekura përfshijnë Libofshën dhe zonat bregdetare përreth, Semanin, Patosin, Krapsin, Kafarajn, zonën Qarr–Bishan, Ballshin dhe Aranitasin. Meqë një fider furnizon mesatarisht tre deri në katër fshatra, ndërprerjet kanë prekur një numër të konsiderueshëm banorësh.
Për shkak të shkarkesave elektrike të shpeshta, puna për riparimin e defekteve nuk kishte nisur ende në momentin e raportimit. Probleme të ngjashme janë konstatuar edhe në zonat rurale të Lushnjës. Ndërkohë, bllokimi i pusetave dhe shimbledhësve ka sjellë grumbullim uji në disa akse rrugore brenda qyteteve dhe në rrugët interurbane, megjithëse deri tani nuk raportohet për bllokim të qarkullimit në këto segmente.
Drejtuesve të mjeteve u bëhet thirrje të ulin shpejtësinë, të ruajnë distancën e sigurisë dhe të tregojnë kujdes të shtuar në zonat me ujë të grumbulluar, mjegull apo rrezik për rrëshqitje gurësh. Autoritetet dhe qytetarët duhet të mbajnë në vëmendje zhvillimin e situatës, pasi moti i paqëndrueshëm pritet të vijojë edhe gjatë fundjavës.
