Materiali, i raportuar nga New York Post, përmban kërcënime të drejtpërdrejta ndaj Zonjës së Parë dhe djalit të presidentit amerikan.
Zonja e Parë e Shteteve të Bashkuara, Melania Trump, dhe djali i saj Barron janë vendosur në shënjestër të një videoje propagandistike që po qarkullon në rrjetet sociale dhe që u është atribuar mbështetësve të regjimit iranian.
Sipas raportimit të New York Post, materiali përmban kërcënime ndaj Melania Trump dhe përpiqet të nxisë ndjekjen e lëvizjeve të saj. Videoja shfaq pamje të Zonjës së Parë gjatë udhëtimeve me autokolonën presidenciale dhe në disa zona të Nju Jorkut.
Në material përmenden edhe skenarë të dhunshëm ndaj saj, ndërsa në fund si objektiv i kërcënimeve paraqitet edhe Barron Trump.
Videoja përdor gjuhë propagandistike dhe u drejtohet mbështetësve të regjimit iranian, duke i paraqitur lëvizjet publike të familjes Trump si objektiva të mundshëm.
Deri tani nuk ka një reagim publik nga Shtëpia e Bardhë për këtë material dhe as një konfirmim zyrtar për autorësinë e tij. Përmbajtja e videos mbetet pjesë e raportimeve mediatike dhe nuk është verifikuar në mënyrë të pavarur.
