Rivaliteti mes dy prej ikonave më të mëdha të kinemasë aksion, Sylvester Stallone dhe Arnold Schwarzenegger, duket se ka qenë shumë më real nga sa mund të mendohej. Stallone ka rrëfyer një episod të pazakontë që, sipas tij, shënoi fillimin e përplasjes së gjatë mes dy aktorëve.
Ngjarja daton në ceremoninë e “Golden Globes” të vitit 1977, në një periudhë kur “Rocky” i Stallones triumfoi si filmi më i mirë dramatik. Aktori, megjithatë, nuk arriti të fitonte në disa prej kategorive individuale ku ishte nominuar.
Sipas rrëfimit të Stallones, Schwarzenegger, me të cilin në atë kohë nuk kishte pothuajse asnjë njohje, nisi ta provokonte gjatë ceremonisë. Situata u përshkallëzua dhe Stallone thotë se reagoi në një mënyrë që sot duket e pabesueshme: mori një vazo të madhe me lule dhe e hodhi në drejtim të aktorit austriak.
Ky episod do të ishte vetëm fillimi i një rivaliteti që do të vazhdonte për më shumë se 20 vite. Në vitet kur të dy ishin në kulmin e famës, Stallone dhe Schwarzenegger përballeshin vazhdimisht në garën për rolet më të rëndësishme të filmave aksion dhe përpiqeshin të tejkalonin njëri-tjetrin.
Duke folur për “The Sunday Times”, Stallone e ka përshkruar atë periudhë si një konflikt tepër serioz.
“E shihni atë ashpërsi. Ai ishte armiku im i betuar. E njëjta gjë ishte edhe me Arnoldin. Ishim në një konflikt serioz, nuk ishte shaka. Ishte si çështje jete a vdekjeje. Duhej të përfundonim bashkë në Koloseun e Romës”.
Megjithatë, pas dekadash rivaliteti, Stallone e sheh sot atë konkurrencë edhe nga një kënd tjetër. Sipas tij, përplasja i detyroi të dy të kërkonin më shumë nga vetja dhe të punonin edhe më fort.
“Është si kur një luftëtar e ofendon tjetrin dhe ai stërvitet edhe më fort për ta mposhtur. Ne absolutisht kishim nevojë për njëri-tjetrin”.
Stallone ka treguar edhe më parë se marrëdhënia mes tyre kishte arritur në një pikë ku dy aktorët nuk dëshironin as të qëndronin në të njëjtën dhomë.
Por vitet sollën një ndryshim të madh. Dy rivalët u afruan përmes projekteve të përbashkëta, ndërsa një prej tyre ishte “Planet Hollywood”, zinxhiri i restoranteve ku u përfshinë së bashku me emra të tjerë të njohur të Hollywood-it, mes tyre Bruce Willis dhe Demi Moore.
Më pas, ata ndanë edhe ekranin në katër filma të serisë “The Expendables”, duke e kthyer një rivalitet të dikurshëm në bashkëpunim profesional.
Stallone u shfaq gjithashtu në dokumentarin e Netflix, “Arnold”, të publikuar në vitin 2023, ku foli me vlerësim për ish-rivalin e tij.
Nga ana tjetër, edhe Schwarzenegger ka pranuar se përplasja nuk ishte thjesht një histori e krijuar për publikun. Në një intervistë të vitit të kaluar, ai kujtoi se për një periudhë të caktuar ata “e urrenin vërtet njëri-tjetrin”, duke thënë se gjatë asaj kohe sulmonin publikisht njëri-tjetrin dhe ndërmerrnin veprime kundër njëri-tjetrit.
Sot, historia mes dy yjeve të filmave aksion ka marrë një tjetër drejtim: nga rivalë që mezi duronin praninë e njëri-tjetrit, Stallone dhe Schwarzenegger u shndërruan në bashkëpunëtorë dhe miq.
