Gjatë operacionit në ambientet e kompanisë, autoritetet sekuestruan 949,658.38 euro cash, për të cilat, sipas hetuesve, nuk u paraqit dokumentacion që justifikonte origjinën apo mbajtjen e tyre.
Një 45-vjeçar shqiptar është arrestuar në ishullin e Rodosit, në Greqi, në kuadër të një operacioni të autoriteteve greke kundër trafikut të drogës dhe pastrimit të parave.
Hetimi ka nisur nga një sasi prej vetëm 35 gramësh kokainë, e zbuluar në portin e Pireut, por gjurmët e hetimit kanë çuar më pas në Rodos, ku autoritetet kanë sekuestruar gati 1 milion euro cash në ambientet e një kompanie imobiliaresh.
Gjithçka nisi më 27 gusht, kur autoritetet arrestuan në Pire një 62-vjeçar grek, i cili kishte mbërritur me traget nga Rodosi. Në valixhen e tij u gjetën 35 gramë kokainë dhe 0.9 gramë kanabis.
Hetimet e mëtejshme çuan autoritetet te një 45-vjeçar shqiptar, i cili punonte në një kompani të pasurive të paluajtshme në Rodos dhe dyshohet nga autoritetet greke se kishte lidhje me dërgimin e lëndës narkotike.
Gjatë operacionit në ambientet e kompanisë, autoritetet sekuestruan 949,658.38 euro cash, për të cilat, sipas hetuesve, nuk u paraqit dokumentacion që justifikonte origjinën apo mbajtjen e tyre.
Në zyrat e kompanisë u gjetën gjithashtu një numër i madh pajisjesh POS, karta bankare, telefona celularë, karta SIM, pajisje elektronike dhe shënime me emra dhe shuma parash.
45-vjeçari shqiptar u arrestua, ndërsa gjatë kontrollit ndaj tij iu sekuestruan edhe 3,750 euro.
Autoritetet greke po hetojnë dyshimet se kompania e pasurive të paluajtshme mund të jetë përdorur si një “fasadë” për pastrimin e parave dhe veprimtari të tjera kriminale.
Dy të arrestuarit janë dërguar pranë Prokurorisë, ndërsa hetimet vijojnë për trafik droge, pastrim të produkteve të veprimtarisë kriminale dhe pjesëmarrje në organizatë kriminale.
