Një temperaturë rreth 60 gradë Celsius konsiderohet zgjedhje më e sigurt për ruajtjen e ujit të ngrohtë në rezervuar, ndërsa në dalje duhet pasur kujdes për të shmangur djegiet.
Një rregullim i thjeshtë i termostatit mund të ndihmojë në uljen e konsumit të energjisë dhe krijimin më të ngadaltë të gëlqeres
Ekziston një mënyrë e thjeshtë e përdorimit të bolierit që shumë njerëz nuk e dinë, ndërsa elektricistët shpesh e zbatojnë edhe në shtëpitë e tyre. Duhet më pak se një minutë për ta rregulluar dhe mund të ndihmojë që bolieri të mos harxhojë energji pa nevojë.
Meqë bolieri është ndër pajisjet që konsumojnë më shumë energji elektrike në një familje, edhe një ndryshim i vogël në mënyrën e përdorimit mund të reflektohet në faturë.
Temperatura e duhur mes kursimit dhe ujit të ngrohtë
Termostati mund të vendoset rreth 55 deri në 60 gradë Celsius.
Nëse bolieri është rregulluar në 75 gradë ose më shumë, uji nxehet shumë më tepër sesa nevojitet për përdorim të zakonshëm dhe më pas përzihet me ujë të ftohtë gjatë dushit.
Bolieri nuk shpenzon energji vetëm kur e ngroh ujin nga e para. Ai ndizet herë pas here edhe për të ruajtur temperaturën, sepse uji humbet gradualisht nxehtësinë përmes rezervuarit dhe tubacioneve.
Kjo do të thotë se sa më e lartë të jetë temperatura e vendosur, aq më shumë energji mund të nevojitet për ta mbajtur ujin vazhdimisht në atë nivel.
Nga ana tjetër, temperatura nuk duhet ulur pa kriter. Uji i vakët që qëndron për kohë të gjatë në rezervuar mund të krijojë kushte më të favorshme për shumimin e disa baktereve, përfshirë Legionella-n.
Për këtë arsye, një temperaturë rreth 60 gradë Celsius konsiderohet zgjedhje më e sigurt për ruajtjen e ujit të ngrohtë në rezervuar, ndërsa në dalje duhet pasur kujdes për të shmangur djegiet.
Temperaturat shumë të larta mund të përshpejtojnë edhe krijimin e gëlqeres. Shtresa e gëlqeres mbështjell rezistencën ngrohëse dhe e bën transferimin e nxehtësisë më pak efikas.
Si pasojë, boleiri mund të punojë më gjatë për të ngrohur të njëjtën sasi uji, ndërsa me kalimin e kohës mund të shkurtohet edhe jetëgjatësia e rezistencësi.
Kohëmatësi dhe tarifa e lirë mund të ndihmojnë edhe më shumë
Nëse keni njehsor me dy tarifa, bolieri mund të programohet të ngrohë ujin gjatë periudhës kur energjia elektrike është më e lirë.
Oraret e tarifës së ulët ndryshojnë sipas vendit dhe operatorit të energjisë, prandaj duhet të kontrollohen në faturë ose te furnizuesi përkatës.
Në praktikë, bolieri mund të ndizet kur fillon tarifa më e lirë dhe të fiket pasi të ketë arritur temperaturën e nevojshme.
Për një bolier prej rreth 80 litrash me rezistencë 2 kW, ngrohja nga uji i ftohtë zakonisht kërkon disa orë, në varësi të temperaturës fillestare të ujit, fuqisë së pajisjes dhe temperaturës së vendosur.
Nëse nuk keni kohëmatës, bolieri mund të ndizet dhe fiket manualisht, por gjithmonë duke respektuar udhëzimet e prodhuesit dhe instalimin elektrik të pajisjes.
Nëse largoheni nga shtëpia për disa ditë, mund të ketë kuptim ta fikni bolierin për të mos shpenzuar energji për mbajtjen e ujit të ngrohtë në një shtëpi bosh.
Ulja e panevojshme e temperaturave shumë të larta, së bashku me përdorimin e tarifës më të lirë kur është e mundur, mund të ndihmojë në uljen e kostos së ngrohjes së ujit.
Gjatë dushit, uji zakonisht përdoret në temperaturë dukshëm më të ulët se ajo që ruhet në bolier. Prandaj, ruajtja e ujit në një temperaturë të arsyeshme dhe përzierja e tij me ujë të ftohtë mbeten mënyra praktike për të pasur ujë të mjaftueshëm dhe për të shmangur shpenzimin e panevojshëm të energjisë.
