Nga aktiviteti i Edicionit të Tretë të Javës së Administratës Publike, kryeministri Edi Rama komentoi protestat në bulevard, ndërsa prezantoi ecurinë e reformës së Kadastrës, luftën kundër korrupsionit dhe digjitalizimin e shërbimeve publike.
Kryeministri Edi Rama komentoi protestat e zhvilluara prej më shumë se një muaji në bulevard, duke deklaruar se për qeverinë kanë rëndësi shqetësimet reale të qytetarëve dhe jo retorika politike që, sipas tij, dominon pjesën më të dukshme të tubimeve. Deklaratat u bënë gjatë aktivitetit të Edicionit të Tretë të Javës së Administratës Publike, me fokus “Shërbimi Publik për një Shqipëri Europiane”, ku kreu i qeverisë u ndal edhe te reformat në administratë, lufta kundër korrupsionit dhe modernizimi i Kadastrës.
Rama tha se protesta duhet lexuar përtej zhurmës politike, duke theksuar se ekziston një pjesë e saj që përfaqëson shqetësime të vërteta të qytetarëve. Ai e cilësoi këtë si “uji i pastër” i protestës, ndërsa shtoi se “nën koren e zezë” të saj janë mbledhur, sipas tij, “të gjithë dështakët dhe zemërakët e Shqipërisë”.
Për të ilustruar këtë qëndrim, kryeministri tregoi historinë e një gruaje të moshuar, e cila kishte marrë pjesë në protestë pasi ishte ndjerë e poshtëruar nga mënyra se si ishte trajtuar në një poliklinikë. Sipas Ramës, rasti nuk lidhet vetëm me zgjidhjen e një problemi administrativ, por me mungesën e respektit dhe njerëzillëkut në shërbimin ndaj qytetarëve.
Ai u shpreh se qytetarët nuk revoltohen vetëm sepse nuk marrin një zgjidhje për problemet e tyre, por sepse shpesh ndihen të injoruar ose të trajtuar pa dinjitet nga institucionet. Në këtë drejtim, Rama theksoi se sfida më e madhe e administratës mbetet përmirësimi i marrëdhënies me qytetarin dhe rritja e cilësisë së shërbimeve publike.
Kryeministri nënvizoi se transformimi i administratës është një proces afatgjatë, i cili kërkon kohë dhe ndërtimin e mekanizmave të qëndrueshëm. Ai kujtoi se ligji bazë i shërbimit civil është miratuar rreth një dekadë më parë dhe se gjatë kësaj periudhe administrata ka kaluar një proces të rëndësishëm profesionalizimi, duke kontribuar edhe në procesin e negociatave të Shqipërisë me Bashkimin Evropian.
Duke folur për korrupsionin, Rama tha se sistemi po vepron për herë të parë në mënyrë të drejtpërdrejtë kundër fenomeneve abuzive, duke kundërshtuar zërat që, sipas tij, pretendojnë të kundërtën. Ai shtoi se ndërtimi i një shteti funksional nuk realizohet me masa të menjëhershme apo ndëshkime spektakolare, por përmes krijimit të institucioneve dhe sistemeve që garantojnë drejtësi dhe funksionim të qëndrueshëm.
Një pjesë të rëndësishme të fjalës së tij Rama ia kushtoi reformës së Kadastrës, duke e cilësuar atë si një nga sfidat më të mëdha të administratës publike. Ai tha se procesi i digjitalizimit tashmë ka përfunduar dhe se faza e ardhshme synon ndërtimin e një sistemi që do të eliminojë përfundimisht problemet historike të këtij institucioni.
“Do të largohet nga jeta e shqiptarëve edhe ky makth i Kadastrës”, deklaroi Rama, duke theksuar se reforma kërkon një punë të gjatë për të sistemuar dokumentacionin dhe problematikat e trashëguara ndër vite. Sipas tij, përmirësimet e qëndrueshme nuk varen nga ndryshimi i drejtuesve politikë, por nga funksionimi i sistemit. “Mund të ndërrosh sa kryeministra të duash, por përmirësimet e qëndrueshme vijnë vetëm nga sistemi”, u shpreh ai.
Kryeministri evidentoi edhe përfitimet që, sipas tij, ka sjellë digjitalizimi i shërbimeve publike, duke kujtuar se qytetarët nuk përballen më me radhët për dokumente dhe se emigrantët mund të marrin shumicën e shërbimeve shtetërore përmes telefonit. Ai shtoi se qeveria po punon gjithashtu për zhvillimin e një sistemi të bazuar në inteligjencën artificiale për prokurimet publike, i cili synohet të testohet vitin e ardhshëm dhe të hyjë në funksion gjatë vitit 2028.
Në përfundim të fjalës së tij, Rama tha se modernizimi i administratës, përdorimi i teknologjisë dhe bashkëpunimi me Bashkimin Evropian mbeten elementët kryesorë për ndërtimin e një shteti më efikas, duke theksuar se vetëm përmes reformave strukturore mund të adresohen në mënyrë të qëndrueshme shqetësimet e qytetarëve.
