Për çdo Ministri, ministrit do t’i bashkangjitet një zv.ministër që do të jetë pjesë e strukturave të Partisë Socialiste dhe do të luajë rolin e një koordinatori mes ministrit, grupit parlamentar ose deputetëve, lidhur me shqetësimet apo problematikat që ato kanë në zonat ku mbulojnë.
Kryeministri Edi Rama pritet të emërojë një mori emrash, pjesë e strukturave të Partisë Socialiste, në pozicionet e zv.ministrave. Me pak fjalë, duket se Rama, i cili po përballet me protesta prej 22 ditësh që kërkojnë dorëheqjen e tij, po forcon lidhjen mes Qeverisë dhe strukturave partiake, për ta shtrirë atë më pas në komunitet.
Vendimi, sipas Report TV, për të emëruar zv.ministrat politikë është marrë në mbledhjen e Grupit Parlamentar të së shtunës. Mësohet se Grupit iu bë e ditur nga Kryeministri Edi Rama, ndërsa këtij të fundit ia kanë shprehur si shqetësim drejtuesit politikë në qarqe.
Dhe duket se emërimi i zv.ministrave politikë në një situatë kur Rama po përballet me protesta, që kanë krijuar një tulatje në grupin parlamentar, është menduar si një fuqizim i ministrive me persona politikë, në një kohë kur më shumë se gjysma e kabinetit qeveritar përbëhet nga emra që nuk kanë qenë pjesë e strukturave apo lidhje të Partisë Socialiste.
Zv.ministrat do të jenë koordinatorë, ose ndryshe një derë e hapur në Ministri për deputetët, por jo vetëm. Fakti që ata do të jenë politikë do të thotë se në fokus të tyre do të jenë pikërisht zgjidhja e problemeve që referohen qoftë nga ligjvënësit ashtu edhe nga strukturat partiake.
Në këtë mënyrë, duket se Rama po i kthehet skemës së vjetër, ndërsa në pothuajse të gjithë mandatet si Kryeministër, ka anashkaluar totalisht strukturat partiake, duke i imponuar atyre emra të rinj ose jo, por që nuk konsideroheshin si pjesë e PS-së.
