Pala iraniane e ka bërë të qartë se nuk mund të ketë marrëveshje nëse Izraeli vazhdon sulmet ndaj Libanit.

Bisedimet diplomatike midis Iranit dhe Shteteve të Bashkuara në Zvicër janë shtyrë zyrtarisht, si pasojë e serisë së sulmeve ajrore vdekjeprurëse të Izraelit në Libanin jugor. Burime të afërta me negociatat bëjnë me dije se Teherani ka refuzuar të dërgojë delegacionin e tij për çështjen bërthamore, duke kërkuar garanci të prera për ndërprerjen e armiqësive në Liban, siç përcaktohet në marrëveshjet paraprake.

Sipas një diplomati të njohur me çështjen, mesazhi i iranianëve ka qenë i prerë: “Ne e kemi frenuar Hezbollahun, ndërsa Shtetet e Bashkuara nuk po arrijnë dot të frenojnë Izraelin. Derisa ta bëjnë këtë, ne nuk do të shfaqemi”. Ky qëndrim i Teheranit, i përmbledhur në parimin “pa Liban, pa marrëveshje”, shihet si një tentativë për të nxjerrë lëshime nga Uashingtoni zyrtar.

Nga ana tjetër, tensionet kanë ngritur pikëpyetje edhe në Shtëpinë e Bardhë. Gazeta Financial Times vëren se Presidenti i SHBA-së, Donald Trump, ka shprehur hapur zhgënjimin e tij me këmbënguljen e Izraelit për të vazhduar ofensivën në Bejrut, e cila po kërcënon seriozisht dështimin e negociatave të nivelit të lartë.

Edhe pse burimet bëjnë me dije se bisedimet janë riplanifikuar paraprakisht për ditën e hënë, gjithçka mbetet e pakonfirmuar dhe në varësi të drejtpërdrejtë nga situata në terren.