Dy ditë para nënshkrimit të një memorandumi mirëkuptimi midis Uashingtonit dhe Teheranit në Zvicër, presidenti amerikan deklaroi nga samiti i G7 në Evian të Francës se lufta mund të rifillojë nëse Irani dredhon nga angazhimet e marra.
“Nuk është një tekst përfundimtar, është një protokoll marrëveshjeje”- tha Trump në një takim dypalësh me Presidentin egjiptian Abdel Fatah al-Sisi në kuadër të samitit të G7 në Evian, “dhe nëse nuk më pëlqen, nëse ata nuk sillen mirë, ne do të fillojmë të hedhim bomba mbi kokat e tyre përsëri”.
Iranianët, shtoi Trump, “janë sjellë keq për 47 vjet”, duke iu referuar përsëri rënies së Shahut, një aleat i SHBA-së, dhe themelimit të Republikës Islamike në vitin 1979. Trump më pas përsëriti se Shtetet e Bashkuara nuk do të investojnë në Iran sipas marrëveshjes së arritur për t’i dhënë fund luftës, detajet e së cilës ende nuk janë bërë zyrtarisht publike.
“Është e rreme”, tha Trump, duke iu referuar raporteve për investime të planifikuara amerikane në Iran sipas marrëveshjes. “Ne nuk do të investojmë as 10 cent” në Iran.
Ndërkohë liderët e vendeve të G7, miratuan një deklaratë të përbashkët ku zotohen të rrisin mbështetjen ushtarake për Ukrainën dhe të forcojnë sanksionet ndaj Rusisë. “Në mënyrë të palëkundur mbështesim Ukrainën në mbrojtjen e lirisë, sovranitetit dhe integritetit territorial të saj”- thuhet në dokument.
Vendet e grupit zotohen gjithashtu të shtojnë dërgesat e sistemeve të mbrojtjes ajrore, interceptorëve dhe kapaciteteve me rreze të gjatë veprimi për Ukrainën. Në deklaratë përmendet edhe mundësia e zgjerimit të licencave që do t’i lejonin Kievit të rrisë prodhimin ushtarak vendas.
Deklarata përshëndet gjithashtu marrëveshjen SHBA-Iran dhe mbështet një mision ndërkombëtar të drejtuar nga Britania e Madhe dhe Franca për mbrojtjen e lundrimit dhe lehtësimin e tregtisë në Ngushticën e Hormuzit. Dokumenti përfshin edhe qëndrimin e vendeve të G7 kundër çdo përpjekjeje të njëanshme për të ndryshuar status quo-në në Detin e Kinës Lindore, Detin e Kinës Jugore dhe në Ngushticën e Tajvanit.
Në samitin e Evianit, liderët e G7 ranë dakord edhe për deklarata të veçanta politike mbi partneritetet globale, luftën kundër kancerit, koordinimin e përgjigjes ndaj Ebola-s, luftën kundër trafikut të drogës dhe goditjen e rrjeteve të kontrabandës së emigrantëve.
