Del akt-ekspertiza për shpërthimin në pallatin e Elbasanit

Facebook
WhatsApp

Instituti i Ndërtimit ka rekomanduar krijimin e një perimetri sigurie prej 20 deri në 30 metrash rreth pallatit, si dhe marrjen e masave për të parandaluar shembjen e pjesëve të dëmtuara.

Shpërthimi që u mori jetën dy personave në Elbasan ka lënë pas jo vetëm apartamente të shkatërruara, por edhe një pallat që tashmë përbën rrezik për banorët dhe këdo që i afrohet. Raporti paraprak i Institutit të Ndërtimit ka nxjerrë në pah dëmtime serioze në strukturën e godinës, duke ngritur alarmin për shembjen e mundshme të pjesëve të saj.

Sipas vlerësimit të inxhinierëve, gjendja më shqetësuese paraqitet në katin e pestë, ku soleta mbi zonën e shpërthimit rrezikon të shembet në çdo moment. Forca e shpërthimit dhe zjarri që pasoi kanë dëmtuar rëndë elementet mbajtëse dhe pjesë të tjera të ndërtesës, duke vënë në dyshim qëndrueshmërinë e saj.

Përballë kësaj situate, ekspertët kanë kërkuar që pallati të mos përdoret dhe hyrja në të të kufizohet deri në përfundimin e ekspertizës së thelluar. Rreziku nuk kufizohet vetëm brenda apartamenteve të dëmtuara, pasi edhe personat që qëndrojnë pranë ndërtesës mund të ekspozohen ndaj rënies së materialeve dhe elementeve të konstruksionit.

Instituti i Ndërtimit ka rekomanduar krijimin e një perimetri sigurie prej 20 deri në 30 metrash rreth pallatit, si dhe marrjen e masave për të parandaluar shembjen e pjesëve të dëmtuara.

Pamjet e publikuara nga brendësia e godinës tregojnë përmasat e shkatërrimit. Mure të rrëzuara, xhama të thyer, mbetje betoni dhe apartamente të shkrumbuara nga flakët dëshmojnë forcën e shpërthimit që goditi ndërtesën pesëkatëshe.

Tragjedia ndodhi më 4 nëntor, kur një shpërthim, që dyshohet se u shkaktua nga rrjedhja e gazit në një apartament të katit të tretë, u pasua nga një zjarr i fuqishëm. Dy persona humbën jetën, ndërsa dhjetë banorë të tjerë morën ndihmë mjekësore.

Pas ngjarjes, 15 familje mbetën pa strehë. Bashkia e Elbasanit nisi procedurat për bonusin e qirasë, ndërsa një pjesë e banorëve u sistemuan përkohësisht në konviktin e qytetit.

Ndërkohë, specialistët po vijojnë analizat e materialeve dhe testimet e strukturës për të përcaktuar nëse ndërtesa mund të riparohet pjesërisht apo do të jetë e nevojshme shembja e saj.

Për familjet e prekura, pasiguria vazhdon edhe pas shuarjes së flakëve. Përveç humbjeve njerëzore dhe dëmeve materiale, ato përballen tashmë me pikëpyetjen se çfarë do të ndodhë me banesat e tyre dhe nëse pallati do të mund të qëndrojë ende në këmbë.

Never miss any important news. Subscribe to our newsletter.

Lajme të Ngjashme

Never miss any important news. Subscribe to our newsletter.

Lajmet e Fundit

Editor's Pick