Sipas informacioneve paraprake, të rinjtë po protestonin paqësisht kur efektivët kanë ndërhyrë dhe kanë shoqëruar disa prej tyre. Deri më tani, Policia nuk ka dhënë shpjegime për arsyet e shoqërimeve.
Vijon edhe këtë të martë protesta e studentëve në ditën e 22-të radhazi. Prej orëve të paradites, të rinjtë kanë marshuar në rrugët e Tiranës duke u futur në disa Fakultete, teksa iu kanë bërë thirrje studentëve të tjerë për të bojkotuar mësimin.
Pas marshimit në rrugët e Tiranës dhe thirrjeve për dorëheqjen e kryeministrit Rama dhe klasës politike 35-vjeçare, të rinjtë dhe qytetarët u zhvendosën përpara Ministrisë së Arsimit, ku bllokuan Rrugën e Durrësit për automjetet.
Ndërkohë policia ka bërë një ndërhyrje duke larguar protetsuesit dhe duke shoqëruar disa prej tyre, kjo me qëllimin për të vendosur gjoba prej 5 mijë lekësh sipas Aktit Normativ “Për Tubimet”.
Kujtojmë se dje forcat e rendit vendosën 16 gjoba me shumën 5 mijë lekë secila për protestuesit që ndodheshin në Bulevardin “Dëshmorët e Kombit”, me motivacionin e “bllokimit të rrugës”.
Gjatë përplasjes së sotme nuk mungoi as konfrontimi i policisë me një gazetar që ishte në raportim direkt.









